Shillong, Lber 26
U Myntri ba dei khmih ïa ka tnad Food Civil Supplies & Consumer Affairs u Bah Methodius Dkhar u la pynthikna ba kam don kano-kano ka jingduna ha ka petrol bad ka diesel ha ka Jylla Meghalaya, watla ka pyrthei baroh kawei ka ïakynduh jingeh.
Haba kren bad ki lad pathai khubor ha ka sngi Palei, u Myntri u la ong, ha kaba ïadei bad ka jinglong jingman ha kylleng ka pyrthei, ka don ka jingduh jingkyrmen ba ka lah ban don ka jingduna ha ka jingpynbiang hynrei ïa kata ym shym la pynthikna, hynrei ha Meghalaya, ym pat don ka jingduna ha ka petrol bad ka diesel.”
U Bah Methodius u la pynshong nongrim ïa ka jingkhmih lynti ïa ka jingduna kaba lah ban mih na ka jingïaleh thma ki ri ka pyrthei kaba dang ïaid shakhmat, hynrei u la pyntip ba ïa kane la nang buddien.
“Lada ka thma kan bteng sa katto katne por, kata ka jinglong jingma ka lah ban mih, hynrei kumba ka long mynta, kam don jingduna kumta,” u la ong.
U la ïathuh ruh ba ka Sorkar kam shym la ïoh kano kano ka kaiphod ba ka don ka jingduna na ki bor pynïaid district.
“U Deputy Commissioner bad ka bor synshar district ki dang buddien ïa ka jinglong jingman, bad ngi la bthah ïa ki nongdie ba kim dei ban pyndonkam ïa kino kino ki kam kiba lah ban wanrah ïa ka jingduna,” u la bynrap.
Haba kylli shaphang ka jinglah ban pyntreikam ïa ka odd-even, u Bah Methodius u la ong, “Kumba ka long mynta, kata ka jinglong jingman kam pat mih, hynrei lada ka jingduna ka don, te un sa peit kaei ka rukom treikam kaba bha tam kaba ngi lah ban shim nangne shakhmat.”
Kumban shu kdew ba la ïohi ha ki rynsan social media ba ha kiwei ki Jylla ki la ïeng lain ban leit thied petrol bad diesel ha ki petrol pump namar ba ka dang ïaid ka thma hapdeng ka Israel bad America pyrshah ïa ka Iran.
