Ka jingïadei jan para briew ka dang don ka jingïajan bha tang ka ïing ka Meikha bad ki khun kha. Ki shikur shi jait ruh ka jingïadei ka la nang phet jngai khamtam leilei haba ngi la shong la sah ha ki jaka ba jngai. Kim ïa don por shuh mynta kum ha ki por ba mynshuwa. Ki shi para ar kmie ruh kim da ïa sngew jan shuh kum ha ki por ba dang im ki kmie ki kpa.
Ka jingïaieit bad sngewjan paralok parajor ruh ka la phet na ka imlang ka sahlang mynta. Tang kiba dang ïadei mat khohsiew bad ka ïa jan ha ka trei ka ktah bad ka kam ka jaka ki kham ïa dei jan paralok. Kata ruh tang kiba ïa shong ïasah ha kajuh ka shong ka thaw ym shah ki jaka ba ïa jngai bah. Wat shipara trai ruh kim don por shuh ban ïa leit ïawan khah khah. Ka daw ka long ba ki don la ka kam ka jam bad nalor ki ïashong ïasah jngai iwei sha mihngi kiwei shathie bad sha sep-ngi. Ka jingïajan ka la hiar ha ka jingïadei wat shi ïing shi sem ruh. Mynta ka la dei ka por ban ïa peit bad ïa snoh kti lang kham jan tang shi ïing shi sem. Namar ha ka jingim jongngi ki briew ka don beit ka jingkylla katba dang mih ki sngi ki ïa. Ym don uba shong sah hajuh ngi hap ban ïa krih ban wad ki lad ki lynti ban kyrshan ïa ka jingim hangne ha pyrthei. Kumta ka jingsngew jan paralok parajor bad para marjan marpa bad para briew ruh la nang phet jngai mynta.
C. B. Iawphniaw
