Shillong, Lber 26
Ka ‘thei rahnar (weightlifting) ka Jylla, ka Larityngkai Lawriniang ka la khur ïa ka takma rnong ha ka Khelo India Tribal Games ha ka sngi Palei ha Raipur.
Kane ka samla ka la lah ban khur ïa katei ka takma ha ka Women 53kg da kaba ka la lah ban rah ha ki 132kg. Ïa ka takma ksiar la khur da ka Jhilli Dalabehera na Odisha kaba la lah ban rah ha ki 160kg bad ïa ka takma rupa la khur da ka Kiuchangliu Gangmei (Manipur) kaba la lah ban rah ha ki 160kg.
Ha kane ka lympung la wan shim bynta 30 tylli ki jylla bad Union Territory, kiba don haduh 3,800 ngut ki nongshim bynta ha ki jingïalehkai bapher bapher kiba kynthup ïa ka archery, athletics, football, hockey, swimming, weightlifting bad wrestling.
Kumba ka long mynta u rangïalehkai na Karnataka, u Manikanta L u la khur ïa ka takma ksiar kaba lai hadien ba u la lah ban pynpaw ïa ka jingtbit ha ka 200m Individual Medley, katba ka Anjali Munda (Odisha) ka la khur ïa ka ksiar kaba ar ha ka sngi kaba ar jong kane ka lympung.
Kawei kaba pynkmen ïa ka Chhattisgarh ka long halor ka jingjop ka Anushka Bhagat, kaba la khur ïa ka takma rupa kaba ar hadien ba ka la wan ha ka kyrdan ba-ar ha 200m IM race jong ki kynthei.
U Manikanta, uba la khur ïa ka takma ksiar ha ka 100m Breaststroke bad 50m Butterfly ha ka sngi Balang, u la bteng ban khur ïa ka jingjop jong u ha ka 200m IM race da kaba u la lah ban pyndep ha ki 2:25.93s. U rangïalehkai na Tripura u Riyaj Tripura u la wan ba-ar da kaba pyndep ha ki 2:34.04s, katba u Kanhu Soren (Odisha) u la khur ïa ka takma rnong da kaba pyndep ha ki 2:36.21s.
Ka Anjali, kaba la khur ïa ka takma ksiar ha ka 200m freestyle ha ka sngi Balang, ka la khur biang ïa ka takma ksiar ha ka 200m IM jong ki kynthei da kaba pyndep ha ki 2:53.82s. Ïa ka takma rupa la khur da ka ‘thei ïalehkai na Chhattisgarh ka Anushka Bhagat da kaba pyndep ha ki 2:59.33s. Ïa ka takma rnong la khur da ka Anjali Mallick na Odisha (3:06.13s).
Haduh mynta ka Karnataka ka dangbat ïa ka kyrdan ba hakhlieh ha ka jinglah ban khur takma kaba kynthup ïa 6 tylli ki takma ksiar bad 2 ki rupa, katba ka Odisha ka la wan ba-ar da kaba khur 3 ki takma ksiar, kawei ka rupa bad 4 ki takma rnong.
