Shillong, Lber 26
Ka jingtrei borbah ki pulit ka East Jaiñtia Hills District naduh ba sdang u bnai Rymphang, 2026 haduh ka 25 tarik u Lber, 2026, ka la lam sha ka jingïoh ban teh lakam ïa ka kam tih bad khaïi dewïong beaiñ ha katei ka District lyngba ka jingkhynra kaba la nang pynjur shuh shuh.
Hapdeng kitei ki tarik kata 45 sngi ei-ei, la don kumba 107 tylli ki ejahar bad 34 ngut kiba la shah kem ha ka jingdon bynta bad ka kam tih bad khaïi dewïong beaiñ.
Ha shiteng jong u bnai Rymphang, hadien ka jingshah pynkynriah u Vikash Kumar, IPS na ka kam kum u SP ka East Jaiñtia Hills District, hadien ka jingjia bthei ka krem dewïong ha Thangsko, la wan ban rung bujli da u Pankaj Kumar Rasgania, IPS uba la pyndonkam da ki buit treikam ban sei madan ïa katei ka kam tih bad khaïi dewïong beaiñ ha ki 45 sngi.
Ki bor pulit na ka jingïatreilang bad ki bor syntiat, ki la ïoh bat bun tylli ki kali kiba pyndonkam kit dewïong beaiñ na kylleng ki jaka katei ka District.
Ha ka 25 tarik u Lber, 2026, ki pulit ki la ïoh bat ïa ki trok kit dewïong beaiñ ha Kongong NGT Check Post, Nongrim Hills. Shuh-shuh la ong ba la ïoh bat kawei ka kali Alto kaba kit dewïong beaiñ ha Damcherra ha Kuliang ha ka 23 tarik u Lber, 2026.
Ki ejahar halor kitei ki lai tylli ki jingïoh bat kali kit dewïong beaiñ la dep ban thep da ki pulit kiba dang ïaid shakhmat ha ka jingtohkit.
Ha kawei pat ka liang ka tnad Home (Police) katkum ka hukum lyngba u Commissioner and Secretary, u Bah R. Rapthap, IAS, ka la pynkynriah noh ïa u Bah Baniateilang Diengngan, MPS na ka kam Additional SP ka East Jaiñtia Hills District bad la pynbna ruh ba yn bujli da u Bah Donkupar Moksha, MPS.
