Nongpoh, Lber 26
Halor ka jingmih ki khubor jong ka jingduna ki tyndong Gas (LPG), ka ophis treikam jong u Deputy Commissioner ka Ri Bhoi District ka la thaw syndon da ka komiti kaba kyrpang ïa kaba la ai kyrteng kum ka LPG Supply Monitoring Committee (LPG-SMC) ban khmih bad pynbit pynbiang ïa ka jingdonkam gas jong ki paidbah ka district.
Ïa kane la pynpaw da u Abhilash Baranwal, DC ka Ri Bhoi haba kren sha ki lad pathai khubor ha ka sngi Palei ha ophis treikam ka jong u ha Nongpoh. U la ïathuh ba kane ka komiti kaba la bthah da ka Sorkar Jylla ban thaw, yn ïadon bynta da ki ophisar ka Sorkar ryngkat bad ki nongsam Gas jong ka district ha kaba ïa ka jingïalang kaba nyngkong eh, la dep ban pynlong ruh ha kane ka sngi.
U Abhilash Baranwal u la ïathuh ruh ba ka jingwan poi jong ki tyndong Gas kala kham duna haba nujor bad ki por kiba la dep la ka dei na ka bynta ki Domestic ne ki Commercial ruh kumjuh na ka daw jong ka thma Israel-US bad ka ri Iran, hynrei u la kyntu ïa ki paidbah ba kin long kiba ïaishah bad ba kim dei ban khih khuslai naba ka Sorkar ka ïaleh ban pynbit pynbiang ïa ki jingdonkam jong ki paidbah.
U la pyntip ruh ba ka jingbook ïa ki tyndong Gas ha ki thaiñ sor ka dei hadien 25 sngi ba la dep ban ïoh katba ha ki thaiñ nongkyndong pat ki paidbah ki hap ban ap haduh 45 sngi shwa ba kin ïoh ban book thymmai biang bad kyntu ruh ïa ki nongsam tyndong Gas ba ki dei ban sam katkum ka jingbook jong ki paidbah khlem da leh shiliang khnang ba kan nym mih kano-kano ka kynrum kynram hadien habud.
