Shillong, Lber 26
U Myntri ka tnad Food Civil Supplier & Consumer Affairs ka Sorkar Jylla, u Bah Methodius Dkhar u la pyntip ba u la thoh sha ka Sorkar Pdeng ban kyrpad pynkiew haduh 50-60 % ka jingpynpoi LPG sha Meghalaya, haba kdew ïa ka jingkiew ki kam jngohkai bad ka shaniah tylli ha ka.
Haba kren sha ki lad pathai khubor ha ka sngi Palei, u Bah Methodius u la ong “Ngi la thoh sha u Myntri ka Sorkar Pdeng ban pynkiew ïa ka bhah ba ju ai sha ka Jylla, dang mynshisngi bad mynnin ruh, ngi la ïoh kham biang ka jingpynpoi ïa ki ‘commercial cylinder’, hynrei ngim shym la ïoh ïa kum kane ka jingpynpoi ba ngi ju ïoh ha ki por ba jai-jai”.
U Bah Methodius u la batai ba watla kam pat don satia ka jingduna ki LPG ban pyndonkam ha ki thliew ïing, hynrei ka la don ka jingduna ka jingpynpoi ïa ki ‘commercial cylinder’.
“Lada ngi donkam 100 cylinder, ngi ïoh 100, hynrei ïa mynta la pynpoi duna da 20%. Kumta lada don ka jingdonkam ba 100, mynta ngin ïoh duna 20% na ka,” u la ong.
U Bah Methodius u la pyntip ba ka Sorkar ka la shim ïa ki lad lynti ban pynthikna ba kam dei ban don ka jingthied ban pynlang ne die black haba ïathuh ba ka Sorkar ka la thung ïa ki Committee ba khlieh da u Chief Secretary bad ki bor District ban peitkhmat ïa ka jinglong jingman.
“Kumba long mynta, ki don katto-kattne ki jingduna na ka bynta ki restaurant bad hotel, hynrei ka jinglong jingman ka la kham biang haba ïa nujor bad ki ar lai taïew ba la lah. Nga ruh nga la shimkhia ban leh ei-ei bad ka tnad ban pynhun ïa ka jingpynpoi LPG,” la bynrap u Bah Methodius.
