New Delhi, Lber:
U Myntri ka tnad Railways u Ashwini Vaishnaw ha ka sngi Balang u la pyntip ha Lok Sabha ba ki la don palat lai klur tylli ki Account thok ïa kiba la weng noh na ka Portal jong ka IRCTC kum shi bynta ban pyrkhing bha ïa ki nongkhaïi tiket bad kiba Booking thok, la ïathuh ka tyllong khubor.
Kane ka sienjam ka long ban pynthikna ïa ka jingïoh tiket rel kaba hok na ka bynta ki nongleit nongwan ba shisha bad ban tehlakam ïa ki kam be-aiñ kiba ju wanrah ïa ka jingduna tiket thok.
Haba jubab ïa ki jingkylli ha ka por kylli jingkylli, u Vaishnaw u la ong ba ka jingweng noh ïa ki Account thok ka la ïarap shibun ban pynduna ïa ka jingktah jong ki nongdie tiket kiba pyndonkam bakla ïa katei ka rukom ban khanglad ïa ki tiket bad die biang ïa ki ha ka dor kaba heh, la ïathuh ka tyllong khubor.
U la ban jur ba kine ki sienjam ki pynthikna ba ki nongleit nongwan ba shisha mynta kin ïoh ïa ki tiket kiba kham bha, khamtam ha ki por ba donkam bha ïa ki tiket.
Haba pynpaw ïa ka jinglah ban siew, u Myntri u la kdew ba ka bynta kaba khraw jong ka jinglah jong ka rel ka long kaba la pynleit jingmut ha ka jingleit jingwan bym don AC.
Kumba 78 percent ki jaka shong ki dei ha ki kyrdan bym don jingpynkhriat, katba haduh 70 percent ki Coach ki dei ki kyrdan ba kyllum bad ba thiah, la ïathuh shuh shuh ka tyllong khubor.
Kane, u la ong, ka pyni ïa ka jingthmu ba kongsan jong ka sorkar ban pynbiang ïa ki lad leit jingleit kiba remdor na ka bynta kiba bun ki nongleit nongwan.
Ban weng ïa ka jingkhapngiah palat, khamtam ha ki lynti ïaid ba jngai, ka Railways ka la pynïaid palat 75,000 tylli ki rel ba kyrpang ha une u snem mang tyngka ba mynta.
U Vaishnaw u la bynrap ba ka jingdon jong ki rel ba kyrpang ba la pynrung ka la nang kiew haba ïanujor bad ki bor synshar ba mynshuwa, kaba ïarap ban pynïaid ïa ka jingdawa ha ka por ba bun ki nongleit nongwan bad ban pynbha ïa ka jingsuk jong ki nongleit nongwan, la ïathuh ka tyllong khubor.
U Myntri u la pynpaw ruh ïa ki jingpynbha ha ka jingshngaiñ ha ki lynti rel, da kaba pynpaw ba ki jingjia aksiden kiba mih na ka jingshah pynjulor ki la duna haduh 90 percent namar ka jingpyrshang kaba bteng bad ka jingbei tyngka ha ki jingtei bad ki rukom peit bniah.
Kane ka pyni ïa ka jingkiew kaba khraw ha ka jingshngaiñ ha ka jingtreikam ha kylleng ka lynti rel.
U Vaishnaw u la pynpaw biang ba ka jingthmu jong ka sorkar ka dang sah ha kaba pynpoi ïa ki jingïakynduh kiba shngaiñ, kiba remdor, bad kiba suk ha ka leit ka wan.
Ka rukom treikam ba la pynïasoh lang ban pynbun ïa ka jinglah, ban tehlakam ïa ki kam be-aiñ, bad ban pynbha ïa ka jingshngaiñ ka long ban pynbha ïa ka jingsngewhun jong ki nongleit nongwan baroh kawei.
Ha ka por mynstep jong kane ka sngi, ka Lok Sabha ka la ai burom ïa ki dkhot barim u Visnu Modi bad u Datta Meghe, kiba la khlad noh dang shen.
U Lamphang u Om Birla bad ki dkhot ki la pynlong ïa ka jingsngap jar shiphang kum ka jingkynmaw burom ïa ki.
U Speaker u la kyntu ruh ïa ki dkhot ban pynneh ïa ka akor bad ban wan pynkhreh bad ka agenda jong ka sngi, hadien ki jingpynthut kiba la mih na ka jingpyrta shla ha ka Ïingdorbar.
