Shillong, Lber 26
Ka Executive Committee jong ka Khasi Hills Autonomous District Council (KHADC) ka la pynkhreh ban thung da ka Special Committee na ka bynta ban pynbeit ïa ka AD Rule khnang ban nym don ka jingbakla.
Katkum ka jingkren u Bah Powel Sohkhlet ha kine ki sngi u la ïathuh ba ka EC ka la shong ha ka 19 tarik mynta u bnai ba sngewdei ban pynkylla ïa baroh ka AD Rule hynrei kim kwah ban leh kyrkieh namar ki donkam ban leh janai.
U la ong ïa ka AD Rule la shna naduh ba la seng ïa ka Sixth Schedule kaba la thaw da u Lat ka Jylla kaba khlem don shuh ka jingpynbeit haduh mynta.
U la ïathuh ba hadien ba u Lat ka Jylla u la mynjur ïa ka bill ba la mynjur da ka Garo Hills Autonomous District Council (GHADC) bad u Myntri Rangbah ka Jylla, u la kyntu ïa ka KHADC bad JHADC ban leh lang kumjuh.
Shuh shuh u la ïathuh ba hashwa ban shong ïa ka EC ki MDC ka VPP ha KHADC ki la dep ïashong ban ïapyrkhat ïa kane ka kam ba ktah ïa ka jaidbynriew.
U Bah Powell u la pynkynmaw ba la katta snem kim pat don ki bar jylla ban thep vote ha ka ilekshon MDC hynrei tang ha u snem 1952 ba la jop ar ngut ki MDC kiba dei ki bar jylla hynrei hadien ki la iehnoh na ka jingïakhih ki riewrangbah ha kito ki por.
U la ong ba na ka jingmynjur ïa ka aiñ ha GHADC, um kwah ba ïa kane ka juh ka aiñ yn wanrah ha KHADC namar lada shah tang ïa ki Schedule Tribe ban ïakhun ilekshon kaba mut hangne ha KHADC ki la don bun tylli ki jaidbynriew kiba dei Schedule Tribe.
U la ong biang ba lada u Lat ka Jylla u bthah ban pynlong ïa ka dorbar kyrpang ka shong ha u Lamphang ban pynlong ïa ka dorbar bad hangta kin sa ïakren sani.
