Washington, Lber:
U President jong ka US, U Donald Trump, u long uba la khreh ban pyllait ia ka jingbitar jong ka jingpynjot ia ka Iran, lada kam pdiang ia ka jingiateh ban pynkut noh ia ka thma ha Middle East, ong ka Press Secretary, Karoline Leavitt, ha ka jingialang lyngkhuh khubor. Ka la ong ba u Trump um ju “lehkai” bad ka Iran kam dei ban khein bakla ia ka jinglong jingman kaba mynta.
“Lada ka Iran kam lah ban pdiang ia ka jingshisha jong kane ka khyllipmat kaba mynta, lada kam lah ban sngewthuh ba ki la shah rem ha ka liang ka shipai bad kin dang iai bteng ban long kumta, u President Trump un pynthikna ba kin shah ktah kham jur ban ia kaba ki la ju shah ktah mynshwa”, la ong ka Leavitt ha ka kyrwoh jong ka.
“U President Trump um ju bluff bad u pynkhreh ban pyllait ia ka dujok. Ka Iran kam dei ban khein bakla biang”, ka la bynrap.
Ka la pynpaw biang ba ka US ka dang bteng ban “pynduh” ia ka bor shipai jong ka Iran, da kaba kam ba kane ka dei ka jingpynduh kaba heh tam ia ka kynhun shipai duriaw ha ki lai taiew naduh ka thma bah ba ar. Ka Leavitt ka la ong ba ka jingkhihwin ka la long ka “jingjop kaba khraw ha ka liang ka shipai”.
Haba kren shaphang ka jingphah ïa ki shipai jong ka US sha Iran, ka la ong ba u Trump un nym pan jingbit na ka Congress namar ba kane ka ri ka don mynta ha “ki jingïaleh thma kiba khraw ha Iran”.
Hynrei ka la kyntait ban ai jingtip bniah halor ka jingiakren bad ka Iran, da kaba ong ba ka dei ka mat kaba khia bha kaba dang sahkut.
Ka la ong ba ki don “ki bynta jong ka jingshisha” ha ka plan kaba don 15 tylli ki mat ba la ong ba la buh da ka ri America, hynrei ka la ong ruh ba katto katne ki khubor kim long kiba shisha pura.”
