Shillong, Lber 26
Ka jylla Meghalaya kan sdang ïa kawei ka lympung ñiah kinglieng ne ka Indian Sailing League (ISL) mynta ka sngi Thohdieng bad ka ban kut haduh ka 31 tarik mynta u bnai ha Orchid Water Sports Complex, Umiam Lake.
Ïa kane ka jingïakop yn pynlong da ka Umïam Sailing Club ha ryngkat ka jingïatreilang bad ka tnat jngohkai pyrthei jong ka sorkar Jylla bad ka United De Novo Association of Yachting (UDAY), ha kaba kin don haduh 182 ngut ki nongshim bynta na ki phra tylli ki ri.
Ha kane ka jingïakop kin don 14 tylli ki kynhun kiba mihkhmat ïa ki thaiñ bapher bapher jong ka ri India, kynthup ïa ka kynhun ïalehkai ka Jylla ka Shillong Umiam Navigators. Kiwei pat ki kynhun ki kynthup ïa ka Deccan Skippers, Secunderabad Daredevils, Goa Mariners, Chennai Sailing Knights, Pune Peshwas, Vir Cholas, Bhopal Tritons, Vizag Vikings, Lake City Tigers, SailX Gorakhpur, Pondicherry Pirates bad ka Mumbai OER SUP Meridians.
Haba kheiñ kyllum ïa ka khusnam na ka bynta kane ka lympung kan long haduh T. 1.5 klur. Ki kynhun ki ban shim bynta ha kane ka lympung kin ïaknieh ïa ka khusnam kaba T. 21 lak, katba ki nongshim bynta marwei kin ïohpdang ïa ka khusnam kaba T. 1.5 lak.
