Shillong, Lber 26
Ka Shillong Lajong FC ka la pynliem noh ïa ka Gokulam Kerala da 2-0 kol na ka bynta ban bteng ïa ka jingjop kaba ar shabar na la ïing ha ka lympung ïalehkai National Football League, ha ka sngi Palei ha EMS Stadium kaba ha Kozhikode.
Kane ka nam jop ka la wan urlong lyngba ki kol ba la thep da u Ever-brightson Sana Mylliem-pdah bad u Treimiki Lamurong na ka bynta ban pynlong ïa kane ka kynhun ïalehkai ka nongbah ban jam sha ka kyrdan balai.
Ha kane ka jingïakhun baroh ar ki kynhun ki la pyrshang ban ïalehkai bha naduh kaba sdang ha kaba ki la pyrshang ban thep kol. Hadien shiteng kynta ka Shillong Lajong ka la ïoh ban pynkhih jar nyng-kong eh lyngba u Ever-brightson Sana Mylliem-pdah ha ka minit kaba 36. Kane ka shi kol ka la nangpynïoh mynsiem ïa kane ka kynhun ïalehkai hapoh ka jingïalam u Virendra Thapa bad ka la tam shi kol haduh kaba kut jong ka kylla step na ka daw ba ka Golkulam kam shym la lah ban pynphai ha kane ka jingïa-khun ha la ïing.
Haduh katto katne por ba la bteng ïa kane ka jingïakhun jong ka kylla miet, ka Lajong ka la thep biang ïa ka kol kaba ar lyngba u Treimiki Lamurong ha ka minit kaba 65. Lyngba kane ka kol kaba ar ka la nangpynskhem shuh shuh ïa ka SLFC na ka bynta ban kynjoh sha ka thong. Haduh kaba kut ka jingïalehkai ka Gokulam kam shym la lah shuh ban pynphai bad ka la mad ïa ka jingshah rem kaba ar ha kane ka lympung.
Lyngba kane ka jing-jop, ka Shillong Lajong ka la ïaryngkat mar 10 poiñ ryngkat ka Sreenidi Deccan bad ka Diamon Harbour, kiba la tam lyngba ka jingïapher ha ka jingthep kol na ka bynta ban don ha ka kyrdan ba nyngkong bad ba-ar.
Lyngba kane ka jingjop ka Lajong kan leit sha Visakhapatnam kaba ha Andhra Pradesh na ka bynta ban ïakhun pyrshah ïa ka Sreenidi Deccan ha ka 1 tarik u Ïaïong.
