Jowai, Lber 26
Kiwei ki nongmihkhmat ki bunkam ban pynkhlaiñ ïa ka seng katba u Ma Lahkmen Rymbui u bunkam ban leit wad ïa ka hok jong ki paidbah.
Ïa kane la pynpaw da u Myntri ka tnad pule puthi ka Sorkar Jylla bad MLA ka Amlarem Ma Lahkmen Rymbui haba kren kum u kongsan ha ka jingplie paidbah ïa ka ïingskul bathymmai jong ka Darrang Govt. LP School, West Jaiñtia Hills District kaba la seng naduh u snem 1983.
Ïa kane ka ïingskul bathymmai kaba don 7 tylli ki kamra class, la tei hapoh ka Mission Education Phase III ha ka jinglut kaba T.44,00,000 jong u snem 2024.
Haba bteng ïa ka jingkren u Ma Lahkmen Rymbui u la ong, ha ki 8 snem ka jingïaid lynti jong ka Sorkar MDA kala pyrshang ban weng ïa ki jingeh hapoh ka tnad pule puthi.
U Myntri u la pyntip ba ha ki 3 tylli ki Mission I, II bad III ka Sorkar kala pynlut kumba 600 klur tam na ka bynta ban pynïoh ïa ki ïingskul kiba paka bad mynta u snem 2026 ha ka Mission IV ka Sorkar kala mang 186 tylli ki skul hapoh ka Jylla ha ka jinglut kaba 70 lak kawei.
U la pyntip ruh ba hapoh Amlarem Constituency ka Kharkhana, Hawaibhoi, Twah-u-sdiah, Thangbuli, Umladkhur, Lamin, Nongbareh Rim, Shkenpyrsit, bad Moosakhia kin sa ïoh ïa ki ïingskul kiba paka.
“Nga dei u Myntri uba ki nonghikai ki isih tam, namar tang ha ka 1 snem shibnai tam ki nonghikai ki lut por tang ban rah lama ïong, strike, shah thngan bad haba ki wan ïakynduh ïa nga, kut tang ha ka eksamin, bad nga shah sin kum u Minister Eksamin”, la ong Ma Lahkmen.
Hynrei u pynpaw pat ka jingkmen ba ka Sorkar Jylla kala pynmih ïa ka jingpynbna ba kan pyntreikam noh da ka tulop ba thymmai ne ka Pay Framework na ka bynta baroh ki nonghikai kiba ju ïoh ïa ka tulop ba la buh beit thik ba kin ïoh (fixed).
Kane kam dei ka jingpyrshang kaba shisngi ka dei da ki snem, hynrei kine kiei-kiei baroh ki urlong dei lyngba ka jingïoh ïa u Myntri Rangbah uba don ka jingshaniah bad ka mynsiem ban thom ïa ki jingeh.
Haba ïadei bad ka pule puthi, u Myntri u la ban jur ïa ki 4 tylli ki paia kiba donkam ha ka jingnang jingstad kata ka ïingskul kaba biang, ki nonghikai kiba tbit, ki policy ka Sorkar, ki khynnah, ka jingïatreilang ki kmie ki kpa bad ka imlang sahlang.
Lyngba ka jingïoh ïa ka ïingskul kaba itynnad, u Myntri u khmih lynti ba ka ‘enrollment’ jong ki khynnah hapoh kane ka skul ruh kan kiew na u snem sha u snem.
Haba kyntu ïa ki nonghikai, u Myntri u la ong, baroh ki khynnah ki dei kiba stad bad ka kamram jong ki nonghikai ka dei ban plie ïa u shabi uba khanglad ïa ki ban pynpaw pyrthei ïa ka sap jingstad ka jong ki bad ha kajuh ka por u la kyntu ïa ki nongshong shnong ban ïatreilang na ka bynta ka bha ka miat ka lawei jong ki khynnah.
U la kren ruh halor ka roi ka par hapoh ka Constituency bad ka kam jngohkai pyrthei hapoh ka thaiñ kaba ka Sorkar lyngba ka tnad Tourism kala theh da ki klur. Nalorkata u la pyntip ruh ba ka Sorkar Kmie kala ithuh ïa ka Umngot kum kawei na ki Inland Waterways.
Hadien ka jingïalang u Myntri u la plie ruh ïa ka Computer Class kaba don 5 tylli ki kor computer ha ka jingïalang kaba la pynïaid da u Chairman ka SMC u Ma Treiborlang Suchen ha ka jingdonlang ka SDSEO ka Kong Wailad Nanghulo, u Dolloi ka Elaka Darrang Ma Pyrwa Lymba, ki nongïalam bad dkhot nongkitkam shnong, ki nonghikai bad khynnah skul nalor ki nongshah khot sngewbha.
La pynphuh pynphieng ïa ka jingïalang da ki jingshad jingrwai ba la shim bynta da ki khynnah katei ka skul.
