Jowai, Lber 26
Ka Goodwill Mupliang SC ka la rung sha ka semi final ha ka District Cricket League 2026 ba la pynlong da ka West Jaiñtia Hills District Cricket Association, hadien ba la pynliem noh ïa ka Young Lads CC da 5 wiket ha ka sngi Palei.
Ha kane ka jingïakhun quarter final ka Young Lads kaba ka tied nyngkong, ka la kamai 152 run ha ki 35 over bad shah pynhap 9 wiket. U Maremdorkini Sutnga u la tied 44 run na ki 51 bol bad u Eshan Siang-shai u la ïoh 13 run. Katba u Greatestful Lyngkhoi bad u Levestar Phawa ki la khur mar 3 wiket.
Haba wan shimti ïa ka pali kaba ar ka Goodwill Mupliang SC ka la kynjoh sha ka thong da kaba kamai 156 run ha ki 23.3 over bad shah pynhap 5 wiket. U Byforcestar Dhar u la long u rangïalehkai ba kynsai ha kaba ka la khyrwit 66 run bad u Oniwanker Sna u la ïoh 35 run. Katba u Meroily Lytan u la khur 3 wiket. Ïa ka nam Man of the Match la ïoh da u Byforcestar Dhar.
Ka jingïalehkai quarter final kaba ar kan long mynta ka sngi Thohdieng hapdeng ka Ummulong SC pyrshah ïa ka West Jaiñtia Police CC ha Khliehtyrchi Mini Stadium ha ka por 9 baje mynstep.
