Shillong, Lber 26
Ka lympung ïalehkai Senior National Khelo India ASMITA Pencak Silat League 2025-26 ka la sdang ha ka sngi Palei ha kaba la sakhi ïa ka jingïalehkai martial art.
Ha kane ka lympung ïalehkai ka ban neh ar sngi kynthih, la wan shim bynta da kumba 300 ngut ki ‘thei ïalehkai na ki 23 tylli ki jylla bad union territory, kynthup ïa ka Meghalaya kaba la long ha Sports Authority of India (SAI) Training Centre kaba ha NEHU.
Ka Pencak silat ka dei ka jait jingïalehkai martial arts kaba na Indo-nesia. La sakhi ruh ïa ka jingpyni ïa ka jingïaleh-kai ‘sparring’ bad ka ‘artistic demonstrations’ kiba long kiba kongsan ha kane ka lympung.
Ka ASMITA league ka dei ka jingthmu jong ka sorkar pdeng ban kyntiew, ban pynkhlaiñ bad pynshlur ïa ki ‘thei ïalehkai jong ka ri ba kin nangkiew sha-phrang ha ki jait jingïa-lehkai bapher bapher. Ïa kane ka jingïalehkai ba kyrpang la pynlong da ka Sports Authority of India, kumjuh ka tnat ïalehkai jong ka Sorkar Pdeng, ka Indian Pencak Silat Fede-ration bad ka Meghalaya Pencak Silat Association.
Ha kane ka sdang sdang la ïadon lang u Myntri ka tnat ïalehkai u Bah Wailadmiki Shylla kum u kongsan bad u Working President ka Meghalaya State Olympic Association (MSOA) Bah John F Kharshiing kum u symbud kongsan.
Ha kane ka jingpyni ïa ka jingïalehkai jong ka pencak silat ha kane ka sngi sdang bad na ka liang u Bah Shylla u la ïaroh ïa ki nongïalehkai kiba la shim bynta ha kane ka jingïalehkai.
“Ban poi sha ka lympung ïalehkai (national) ka mut ba phi la dep ban jop ha ka kyrdan ïalehkai hapoh ka Jylla, kumta khublei shibun ïa phi ki nongïalehkai”, la ong utei u Myntri.
U la ïaroh ruh ïa ka jingthmu jong ka ASMITA ban kyntiew ïa ki kynthei ha ka jingïalehkai bad u la pynpaw ha ki nongïalehkai bad kiwei kiba la don lang ha kane ka lympung ba ka jylla Meghalaya ka la pynkupbor ïa ki kynthei naduh ki spah snem.
U la bynrap ruh da kaba ong ba ka Megha-laya ka la bei tyngka shibun ha ki kam ïalehkai naduh ki nongïalehkai, ki jaka ïalehkai bad ki tiar ki tar naduh u snem 2018 bad u la kular ba yn sa pyrkhat ïa ka jingpynrung ïa ka pencak silat ha ka 39th National Games 2027 ka ban long hapoh ka jylla Meghalaya.
