Gangtok, Lber:
Kumba la sakhi, na ka jingneh ba bun sngi jong ka jinghap u slap uba jur ha kiba bun ki bynta jong ka North Sikkim, kiba bun ki surok ki la shah pynjulor bad shah khang lynti. Ha kaba ïadei bad kane, ka tnat ba dei khmih ïa ka jinglong jong ka suiñbneng, ka la dep maham shwa ha ki taïew ba la lah ba kan sa don ka jinghap jong u slap uba jur bad ka jylla kan sa shah ktah na ki jingshah thombor ha ki bor ka mariang.
Kumba ka long mynta, ki bor ba dei khmih, ki dang bteng ban pynbit pynbiang ïa ki jingdonkam na ka bynta ban pynkhuid bad pyllait ïa ki lynti ba la shahkhang na ki jingtwa khyndew ha kylleng ki jaka.
Ki la don kumba 200 ngut ki nongjngohkai pyrthei kiba la sahkut ha Chungthang ha North Sikkim hadien ka jingtwa khyndew bunsien, kaba la mih na ka jingjur slap, kaba la pynthut ïa ka jingïaid lynti ha surok, la ïathuh ki heh sorkar ha ka step jong ka sngi Balang.
U Anant Jain, u District Collector jong ka Mangan, u ïathuh ba katei ka jingtwa khyndew, ka la jia ha ka miet jong ka sngi Ba-ar, ha shilynter ka surok kaba kongsan bha jong ka Chungthang sha Lachen, kaba la pynlong ia ki nongjngohkai kiba leit sha Lachen, kiba sahkut ha shiteng lynti.
Ki nongwan jngohkai kiba sahkut la pynsah miet ha kawei ka ktem jong ka ITBP bad ha kawei ka Gurudwara ha Chungthang, u la ong.
Ka jingtrei ban pynbha pat ïa ki surok da ka Border Roads Organisation (BRO) ka dang ïaid shakhmat, la ong ki heh sorkar bad bynrap ba ki bor pynïaid kin sa bishar bniah ïa ka jinglong jingman bad ki lah ban ailad ïa ka jingleit jingwan tang hadien ba la pynbna ba ki lynti ki long kiba shngaiñ, katkum ka jinglong ka suiñbneng.
Ki don ki nongjngohkai pyrthei naduh katei ka por kiba la leit phai biang sha Gangtok bad ki la pynsangeh noh ïa ka jingthmu leit jingleit jong ki, ki la ong.
Ha kajuh ka por, ka surok ban leit sha Lachung, kaba la khang ruh ha ka miet jong ka sngi Ba-ar, la lah ban pynkhuid noh, bad ïa ki nongjngohkai pyrthei na katei ka liang, la phah biang da kaba suk sha Gangtok, ha ka step jong ka sngi Balang.
Ki heh sorkar ki la ïathuh ba ki dang buddien bha ïa ka jinglong jingman namar ba u slap ba man ka por u dang bteng ha katei ka thaiñ.
Ka lynti Lachen ka dang shu plie biang dang shen ha ka 9 tarik u Lber hadien ba ka la shah pynjulor jur ha ka Glacial Lake Outbust Flood (GLOF) ha u snem 2023. Nalor kata, ki jaka jngohkai kiba kongsan kum ka Tsomgo Lake bad Nathula ki dang khang namar ka jinghap slap kaba jur ha kine ki khyndiat sngi ba la dep.
