Guwahati, Lber:
Ïa ka jingthep kyrteng jong uwei u kyrtong ka seng Congress, u Mahananda Sarkar na Barpeta la weng noh namar ki jingbym biang ha kaba ïadei bad ki rukom thep kyrteng. Ka ECI ka la ong ba ka jingkhmih bniah ïa ki kot ki sla jong ki nongthep kyrteng na ka bynta ka General Election sha ka Legislative Assembly ha Assam, 2026 ka la dep na ka bynta baroh 126 tylli ki Assembly konstitwensi. Ïa ka jingkhmih bniah ïa ki kot ki sla la leh ha ka sngi Ba-ar. Ha kaba ïadei bad kane, ka jingkhmih bniah ïa ki kot pynrung kyrteng na ka bynta Barpeta bad ka Dhekiajuli Assembly Constituencies ha katei ka sngi la pynsangeh shwa bad mynta la lah ban pyndep.
Ka seng Congress ha kane ka sngi U Blei ka la pynbna ïa ka thup kyrteng kaba san bad kaba khadduh jong ki hynñiew ngut ki kyrtong na ka bynta ka elekshon sha ka ïingdorbar thawaiñ ka jylla Assam.
Da kane, ka seng ka la pynbna kyrtong ïa ki 101 tylli na ki 126 tylli ki seat ha ka ïingdorbar ka jylla.
“Ka Central Election Committee (CEC) jong ka Congress ka la jied ïa ki kyrtong ka Congress na ka bynta ki elekshon ban wan sha ka Ïingdorbar Thaw Aiñ jong ka jylla Assam,” ong ka kyrwoh ba thikna na u General Secretary jong ka AICC, Organisation, u K C Venugopal.
Napdeng ki kyrtong kiba la pynbna ha ka thup ba khatduh ki long u Bah Joseph Hasda na Gossaigaon seat, u Birkhang Boro na Dotma-ST, u Rajat Kanti Saha na ka Bijni bad ka Anchula Gwara Daimary na Bhergaon seat.
Ka seng ka la pynbna ruh ïa u Narayan Adhikari kum u kyrtong jong ka na Mazbat, ïa u Nirmal Langthasa na Haflong-ST bad ïa u Amar Chand Jain na Katigorah Assembly konstitwensi.
Ka Congress ha ka sngi Thohdieng ka la pynmih ïa ka thup kaba saw jong hynñiew ngut ki kyrtong, ha kaba ka la pynhap noh ïa uwei u MLA uba dang shong katba ka la iehnoh 11 tylli ki shuki na ka bynta ka seng ba la ïatreilang jong ka, ka Raijor Dal.
Ka seng, kaba ïakhun ïa ka elekshon Jylla, kum shi bynta jong ka jingïatehlok jong ki hynriew tylli ki seng, ka la pynbna kham mynshwa, ba kan iehnoh ïa ki 15 tylli ki seat, na ka bynta ki paralok jong ka.
Ka seng Congress, ka la jah rngai ha ka jylla Shatei-lam-Mihngi, naduh u snem 2016, katba ka sorkar ba la ïalam da ka BJP, kan peit ïa ka samoi kaba lai kaba beit.
Ha kane ka ïingdorbar kaba la mih noh, ka seng BJP kaba synshar ka don ïa ka bor kaba 64 ngut, katba ka Asom Gana Parishad kaba ïatreilang bad ka, ka don 9 ngut ki MLA, ka United People’s Party Liberal 7 ngut bad ka Bodoland People’s Front 3 ngut.
Ha ka liang pyrshah, ka Congress ka don 26 ngut ki MLA, ka AIUDF ka don 15 ngut bad ka CPI(M) ka don uwei u dkhot. Don ruh uwei u nongthaw aiñ Independent.
Ka elekshon sha ka ïingdorbar Assam kaba don 126 ngut ki dkhot kan long ha ka 9 tarik, Ïaïong bad ka jingñiew vote kan long ha ka 4 tarik u Jymmang.
