Shillong, Lber 26
U Secretary of the Meghalaya Basketball Association, u Bah Wanlambok Ïawphniaw u la shah jied kum u Manager jong ka kynhun ki rang bad ki ‘thei ïalehkai ka ri India ki ban leit shim bynta ha ka FIBA U-18 Asia Cup – SABA U-18 Qualifiers 2026, ka ban long ha Sri Lanka naduh 6 haduh 10 tarik u Jymmang mynta u snem.
Ïa kane la pynbna da ka Basketball Federation of India (BFI), kaba la ai jingtip sha ka Meghalaya Basketball Association. “U Bah Wanlambok Ïawphniaw, Secretary ka Meghalaya Basketball Association, u la shah jied ban shimti kum u Manager ka kynhun ïalehkai ka ri ka ban leit shim bynta sha katei ka lympung ka ban long ha Sri Lanka,” la pynpaw u Secretary General ka BFI u Kulvinder Singh Gill.
Shuh shuh katei ka synjuk ka pyntip ba kan pynlut nadong shadong ïa ka leit ka wan, ka bam ka dih bad ka jaka sah na ka bynta katei ka lympung.
Ka BFI ka la kyntu ruh ïa u Bah Ïawphniaw ba un ai jingtip ha ka por kaba biang halor ka jingpdiang ïa katei ka jingtyrwa.
