Shillong, Lber 26
Ka Hills State People’s Democratic Party (HSPDP) haduh mynta kam pat shim ïa ka rai ban ïakhun ha ka ilekshon MP shiteng samoi ka Lok Sabha na Shillong Parliamentary Seat ka ban wan. La pyntip da u nongïalam ka HSPDP uba dei ruh u Myntri Sorkar Bah Methodius Dkhar.
Haba kren sha ki lad pathai khubor u Bah Methodius u la ong, “Kum ka seng ngim pat ïashong ne ban ïakren ïa kane ka kam. Ngan sa lah ban ïathuh sha phi tad ynda ngi la shong jingïalang bad ïakren hapoh ka seng, nangta ngan sa lah ban ïathuh ïa phi ïa ka jingmut jong ngi la ngin ïakhun ne em ïa ka ilekshon shiteng samoi”.
Ïa ka ilekshon MP Lok Sabha shiteng samoi na Shillong Parliamentary Seat la hap ban pynlong namar ka jingkhlad noh jong u MP ka VPP u Dr. Ricky A.J Syngkon ha ka 19 tarik Rymphang 2026.
Haduh mynta ka seng kam pat khot jingïalang ban ïakren halor kane ka kam, la ïathuh u Bah Methodius bad bynrap “Ngan nym lah ban kren eiei halor kane hynrei shen ngin sa shong jingïalang bad ngin sa pyntip sha phi.”
Haba kylli pat ba u don aiu ban pynpaw kum u riew shimet, u Bah Methodius u la pynskhem da kaba ong, “Naba nga don ha ka seng saiñpyrthei, ngam dei ban ïathuh ïa ka jingmut shimet jong nga. Ngan kohnguh ïa kaei kaba ka seng jong nga ka rai namar ka rai jong ka seng ka kham kongsan ban ïa ka jingsngew shimet jong nga.”
