New Delhi, Lber:
U Myntri Rangbahduh ka ri u Narendra Modi un leit sha Gujarat ha ka 31 tarik u Lber ban plie bad buh maw nongrim na ka bynta ki projek pynroi sor kiba bun jait, namar ba ka jylla ka pynpaw ïa ki arphew snem jong ka jingkylla sor kaba stet bad ka jingpynbun ïa ki jingtei.
Kane ka jingleit jngoh ka long ha ka por ba ka Gujarat ka dap 20 snem naduh u snem 2005, ha kaba u Narendra Modi, Myntri Rangbah ha katei ka por, u la pynbna ïa katei ka snem kum ka “Urban Year” da kaba pynleit jingmut ha kaba pynkhlaiñ ïa ki jingtei ha ki jaka sor.
Ka sorkar jylla ka la ong ba ïa ka jingïaid lynti jong ka jingpynroi sor la pyndep ha ki arphew snem ha u snem 2025, ha kaba ka Gujarat ka la sakhi ïa ka jingkiew kaba khraw ha ka jingpynroi sor ba la thmu bad ki jingtei paidbah.
Ki heh sorkar ki la ong ba ki nongbah ha kylleng ka jylla ki la ïohi ïa ka jingpynheh ïa ki surok, ki jingshai ha surok, ki pipe um dih, ki jaka pyntuid um jakhlia, bad ki jaka rep ha sor.
La ai ïing ruh ïa ki bynta kiba kham tlot ha ka ïoh ka kot bad ka imlang sahlang ha ki jaka sor, ryngkat bad ka jingpyntreikam ïa ki skhim shna sor kiba bun kiba thmu ban pynsted ïa ka jingkylla sor bad ban pynbha ïa ka jingsuk ha ka jingim.
Ban pynneh ïa kane ka jinglong, ka sorkar hapoh u Myntri Rangbah ka jylla u Bhupendra Patel ka la pynbna ïa u snem 2025 kum ka “Urban Development Year” ha ka mang tyngka jong ka jylla kaba hashwa.
