Shillong, Lber 27
U Myntri Rangbah ka Jylla, u Conrad K. Sangma ha ka Sngi Thohdieng u la ai khublei ïa u Myntri Rangbahduh ka ri, u Narendra Modi bad ka Sorkar India kaba la pynhiar ïa ka khajna (Central Excise Duty) halor ka ‘Petrol’ bad ‘Diesel’ da T.10 shi litar na ka bynta ka jingpyndonkam hapoh ka ri, da kaba kdew ïa ka jinglong-jingman ha ka thaiñ Sepngi ka Asia.
“Ka jingkhublei ïa u Myntri Rangbahduh, u Narendra Modi bad ka Sorkar India na ka bynta ka rai ban pynhiar ïa ka khajna (Central Excise Duty) halor ka ‘Petrol’ bad ‘Diesel’ da T.10 shi litar na ka bynta ka jingpyndonkam hapoh ka ri haba peit ïa ka jinglong-jingman ha ka thaiñ Sepngi ka Asia,” la thoh u Conrad ha ‘X’.
“Kane ka sienjam kaba biang por kan wanrah ïa ka jingsuk kaba khraw ïa ki nongshong shnong ha kylleng ka ri,” u la bynrap.
