Aizawl, Lber:
Ki heh jong ka tnad jngohkai pyrthei ha Mizoram, ba la ïalam da u Myntri u Lalnghinglova Hmar, ha ka 24 tarik u Lber, ki la pynlong ïa ka jingïakren bad ki nongmihkhmat jong ka Mizoram Synod ban thaw ïa ki buit ban pynïaid ïa ka jingwan kiew jong ki nongjngohkai pyrthei katba dang pynneh pynsah ïa ka imlang sahlang bad ka kolshor jong ka jylla.
Ka jingïalang ka la pynleit jingmut ha kaba ïadei hapdeng ka jingroi ka ïoh ka kot bad ka jingïada ïa ka jinglong kyrpang jong ka Mizoram.
U Hmar u la buh ïa ka lynti ïaid na ka bynta “ka kam jngohkai pyrthei kaba don jingkitkhlieh,” da kaba kdew ba ka jylla ka dang pynkhreh na ka bynta sa kawei pat ka snem kaba la buh rekod ha ka jingwan ki nongwan jngohkai pyrthei.
U la pynpaw ba ka kam jngohkai pyrthei jong ka Mizoram ka la poi sha ka kyrdan kaba heh tam ha u snem 2025, ha kaba palat 8 lak ngut ki nongjngohkai pyrthei ki la wan jngoh ïa ka jylla. Da ki jingkheiñ kiba pyni ïa ka jingkiew kaba kham jur ha u snem 2026, u Myntri u la ban jur ba ka jingkiew jong ki nongwan jngohkai ka dawa ïa ka jingthmu kaba la buh ryntih nalor ka jingpynheh ïa ki jingtei.
Haba pdiang sngewbha ïa ka jingkiew, u Hmar u la ban jur ïa ka jingdonkam ban pynsngewthuh paidbah halor ka jingpdiang ïa ki nongwan jngohkai na ki kolshor bapher bapher. “Da ka jingbun ki nongjngohkai pyrthei kiba rung sha Mizoram, ngi dei ban hikai lypa ïa ki shaphang ki jingsngewkhia jong ka thaiñ ban ïada na ka jingïakynad ha ka imlang sahlang. Dei ban burom ïa ka akor ka burom jong ka Balang bad ki kyndon jong ka imlang sahlang,” u la ong.
Ki nongmihkhmat jong ka Mizoram Synod ki la ai khublei ïa ka jingkiew jong ka jylla ha ka kam jngohkai pyrthei bad ki la pynpaw ïa ka jingdonkam ban pynthikna ba ki nongwan jngohkai kin ïoh mad ïa ki riti dustur jong ka Mizoram da kaba shisha.
Ki la pynpaw ruh ïa ka jingdonkam jong ka buit treikam sorkar kaba shai ban pynneh ïa ka jinglong ba janai jong ka kolshor ryngkat bad ka jingroi jong ka kam jngohkai pyrthei.
Ki heh sorkar ki la kdew ba ka polisi jngohkai pyrthei jong ka Mizoram ka long kaba la pynshong nongrim ha ka phang pdeng jong ka CAN, ka kolshor, ka jingleit jngohkai pyrthei, ka mariang, kaba buh ïa ka jylla kum ka jaka jngohkai pyrthei kaba kyrpang.
Ka bynta ba kongsan kaba la ïakren ha ka jingïalang ka long “ka jngohkai pyrthei ha ka kolshor,” khamtam eh ban pyni ïa ka jinglong Mizo bad ka pateng Khristan kaba la rim bha jong ka jylla.
Baroh arliang ki la mynjur ïa ka jingdonkam ban ai jingtip lyngkot ïa ki nongjngohkai pyrthei shaphang ki riti dustur jong ka thain ban pynthikna ïa ka jingïadei kaba don burom bad ki paidbah. La ïakren ruh ïa ka bynta jong ki Balang, da kaba ai jingmut ba ki jaka mane niam ki lah ban noh synñiang ym tang ha ki por lehkmen kum ka Khristmas hynrei kum ki rynsan na ka bynta ka jingïadei kaba kham jylliew ha ka kolshor.
Ka jingïalang ka long hadien ka jingïamir jingmut kaba kham mynshuwa bad ka Council jong ki Balang ha Mizoram kum shi bynta jong ka jingpyrshang jong ka sorkar ban pynwandur ïa ka rukom jngohkai pyrthei kaba pura bad kaba lah ban neh.
