Jowai, Lber 27
Ka Federation of Khasi Jaiñtia & Garo People (FKJGP), West Jaiñtia District ha ka 27 tarik Lber ka la pynlong ïa ka jingïaid ‘Rally’ ha Jowai ban dawa na ka Sorkar Jylla ban pynbeit ïa u pud u sam hapdeng ka Meghalaya bad Assam.
Kane ka jingïaid ‘Rally’ ka sdang na Lad Kiang Nangbah College bad ïaid lyngba ïa ka Ladthadlaboh, Loomsooiung Newhill Jowai, ryngkat ka jingpyrta ban dawa na ka Sorkar ban pynbeit noh mardor ïa u pud u sam.
Ha kane ka jingïaid ‘Rally’ la ïashim bynta da ki spah ngut ki dkhot ka FKJGP, kumjuh ki dkhot ka KSU, JSU, Synjuk Waheh shnong Ri Jaiñtia, ki nongïalam bad nongshong shnong ka thaiñ khappud kiba la wan kyrshan ïa kane ka ‘Rally’.
Hadien ka jingïaid ‘Rally’, la pynkut ïa ka prokram ha Ïawmusiang, ha kaba la pynlong ruh ïa ka jingïalang paidbah ban ïakren halor ka jingdonkam ban pynbeit noh ïa u pud u sam ha ki bynta khappud kiba dang don jingïakajia bad ba dang sahteng ka jingpynbeit.
U President ka FKJGP, u Bah Dundee C. Khongsit, u la ong ka Jylla ka la ïaid 54 tylli ki snem hynrei haduh mynta-mynne, ki paradoh-parasnam ki dang lynga ha ka thaiñ khappud.
“Lada ki paradoh-parasnam ki tyrha ha ka thaiñ khappud, ka dkhot met kaba don hapoh nongbah Shillong kan pyntyrha ïa ka Shillong hi baroh kawei,” la ong u Bah Dundee.
Ka Sorkar Assam ha ki thaiñ khappud ka ai ïa ka ‘Free Registration’ ïa ki jaka katba ka Sorkar Meghalaya ka shongkli kti bad shongsuk shongsaiñ bad haba ki nongshong shnong ka thaiñ khappud ki wan sha ki distrik bapher-bapher ban pynrung kyrteng ïa ki jaka hynrei ki ophisar bad nongtrei kim ju don ha ki ophis, la ong shuh-shuh u Bah Dundee.
Haba phah ïa ka khubor sha ka Sorkar, u Bah Dundee u la ong ba ym dei ban kheiñ sting shuh ïa ki jingeh ba ki nongshong shnong ka thaiñ khappud ki ïakynduh.
“Kum ka jaidbynriew ngin ïatylli kawei khnang ba ka jingsuk kan wan phai ha ka thaiñ khappud,” u la ong.
U la ong, ki shithi ki la dap ha ka miej, hapoh Secretariat bad ki sengbhalang bapher-bapher kila leit ïakynduh ïa ka Sorkar na ka por sha ka por ban ai jingthoh ïa ki jingdonkam ban pynkhlaiñ ïa ki ‘Police Station’, ‘Police Outpost’ ha ka thaiñ khappud kumjuh haba phai sha ka thaiñ khappud India-Bangladesh ki nongrep trai ri ki la duh ei da ki hajar akar ki jaka rep, hato ki nongshong shnong ha ka thaiñ khappud kim don hok ban im ban trei ban ktah, ban rep ban riang?
Lada ka Sorkar kam shim ïa ka jingkitkhlieh, ka dei ka kamram jong ki paidbah ban shim ïa ka jingkitkhlieh ban dawa na ka Sorkar ba ka dei ban leh mardor ïa ka jingeh ki paid ka thaiñ khappud, la ong u Bah Dundee.
Hashuwa, u President ka FKJGP Jaiñtia Hills District, Bah Tuesday Lytep u la ther tyngeh ïa ki nongmihkhmat ki bym don por ban wanrah ka roi ka par ha ka thaiñ khappud.
U la kynnoh ruh ba ki nongmihkhmat kiba mynta kim don por ban pyrkhat ïa ki jingeh ki paid ka thaiñ khappud hynrei ki pyrkhat beit tang kumno ban pynïar ïa ka ‘business’ khnang ban ïohnong.
Ha kane ka sngi la ïoh ruh ka jingkren na ki nongïalam jong ki sengbhalang bapher-bapher, bad na ki katto-katne ngut ki nongshong ka thaiñ khappud nalor kiwei-kiwei.
