Shillong, Lber 27
U nongïalam ka BJP, Bah A.L. Hek ha ka Sngi Thohdieng u la ong ba ki don katto-katne ngut ki MLA kiba dang hapdeng ka jingshakri kam (Sitting) bad ki barim kumjuh kiba lah ban pynïasoh noh shen sha ka seng, watla um shym la pynmih ïa kino-kino ki kyrteng ne ka por haba ïadei bad kane ka bynta.
“Ka lah ban jia ha kano-kano ka por ynda ki la long kiba la khreh”, la ong u Bah Hek haba kren sha ki nongthoh khubor.
“Ki don bun bah ki MLA ba dang hapdeng ka jingshakri kam bad ki MLA barim kiba dang thmu ban pynïasoh sha ka BJP, bad nga kyrmen ba shen kan sa urlong,” u la ong.
Na ka liang u Bah Hek u la ai burom ïa kane sha u Myntri Rang-bahduh ka ri, u Narendra Modi, da kaba ong ba ka BJP ka la “trei bha” bad ba ki paidbah ki dang don “ka jingngeit bad jingshaniah” ha ka.
Haba kylli shaphang ki MLA kiba thmu ban pynïasoh bad kiba pan tiket na ka National People’s Party (kaba synshar), u Bah Hek u la ong ba ka BJP kan ïai bteng ban tei ïa la ka nongrim ha la ka jong ka rukom.
“Tang namarba ki MLA barim ne ki MLA ba dang don hapdeng ka jingshakri kam ki pynïasoh sha kano-kano ka seng, kam mut ba kin jop beit,” u la ong.
“Ka jingkheiñ ka long kaba donkam ha ka saiñ pyrthei. Ka saiñ pyrthei kam dei ka kam kaba suk,” u la ong.
U la kdew ba kiwei ki trei shitom hynrei ka jingjop ka shong ha ki nongthep ‘vote’.
“Ka jingtikna ban jop kam dei ha ka kti ki ‘riewsaiñ pyrthei hynrei ka shong ha kti jong ki paidbah. Dei ki paidbah kiba jied ïa ki MLA, ki MP bad ïa ngi kum ki ‘riewsaiñ pyrthei,” u la ong.
Halor ka jingkylli la ka NPP ka lah ban jop ha ryngkat ka jingbun paid ha u snem 2028, u Bah Hek u la ong ba ka bor ka khring hi ïa kito kiba thrang ban ïakhun.
“Lada phi don ha ka bor, te baroh ki shah khring ban ïadon bynta lang ha ka bor. Ka ju long kumta,” u la ong bad bynrap ba ka la jia wat ha ka por jong ka Sorkar Congress.
