Nongstoiñ, Lber 27
Ka ophis treikam jong ka Mawshynrut Civil Sub-Division shen kan sa ïoh noh ïa la ka jong ka ïingmala kaba paka ïa kaba yn sa tei hapoh Mawshynrut hadien ba ka Sorkar Jylla lyngba ka ophis jong u Chief Engineer ka tnad PWD (Building) ka la dep ban mang pisa ha ka jinglut ka ban kot haduh T.7 klur tam.
Lah ban kdew hangne ba ka Mawshynrut Civil Sub-Division ka la ïaid mynta ha ki khyndai snem naduh ba la plie paidbah ïa ka, ha ka 10 tarik u bnai Naitung, 2017.
Katkum ka khubor bad lyngba ka jingpynbna jong u MLA ka Mawshynrut, u Bah Methodius Dkhar ha ki rynsan ‘Social Media’, la ong ba ïa ka ïingmala jong ka Mawshynrut Civil Sub-Division la dep ban mang tyngka bad la dep ruh ban khot ‘tender’ na ka bynta katei ka projek bad shen yn sa sdang ruh ban pyntrei noh.
Lah ban kdew hangne ba na ka liang jong u MLA ka Mawshynrut Constituency uba bat ruh mynta kum u Myntri ha ka Sorkar Jylla u la ïakhun tyngeh na ka bynta ban pynurlong ïa kane ka projek bad ym tang kane hynrei la sakhi ruh ba kiba bun ki projek kam pynroi hapoh ka thaiñ Mawshynrut ki la ïai tuid na ka sngi sha ka sngi. Ha ki jingthoh ha ki rynsan ‘Social Media’ ryngkat ka shithi ba la phah na ka ophis Chief Engineer ka tnad PWD (Building), u Bah Methodius u la ong, “Hapdeng kiba bun ki jyrwit-jyrwat ha u bnai Risaw jong u snem 2025 ngi la lah ban pyndep ban phah ïa ka DPR na ka bynta ka Mawshynrut Civil Sub-Division bad mynta nga sngewkmen ba ngi la ïoh ïa ka mang tyngka bad la dep ruh ban khot ‘tender’.”
Shuh shuh u Bah Methodius u la pynpaw ka jingsngewnguh ïa u Blei Nongbuh Nongthaw bad kumjuh ïa ki paidbah ka Mawshynrut Constituency baroh kawei. .
