Jowai, Lber 27
Ka West Jaiñtia Police CC ka la khur ïa ka jingjop ha ka jingïalehkai quarter final kaba ar jong ka District Cricket League 2026 ba la pynïaid da ka West Jaiñtia Hills District Cricket Association (WJHDCA).
Kane kala wan hadien ba ka West Jaiñtia Police CC kala jop da ka DLS Method namar u slap uba jur.
Ha ka jingïakhun pyrshah ïa ka Ummulong SC, ka West Jaiñtia Police CC ka la jied ban tied nyngkong bad ka la lah ban kamai 169 ron na ki 34.1 over shuwa ba kin hap lut baroh ki wiket.
U Markini Lathong ula tied 37 ron na ki 69 bol, katba u Captain Obadaia Bareh ula tied 35 ron na ki 31 bol. Na ka liang ki bowler jong ka Ummulong SC, u Pynskhem Phawa ula leh bha da kaba shim 3 wiket na ki 5 over, katba u Heimonlang Lyngdoh u la ïoh 2 wiket na ki 7 over.
Ha ka pali kaba ar, ka Ummulong SC ka la sdang ban beh ïa ka thong hynrei ka la lah tang ban kamai 87 ron na ki 22.2 over bad hap 8 wiket. U Sylvester Mylliempdah u la tied bun tam da 36 ron na ki 42 bol.
Na ka West Jaintia Police CC, u Monjur u la long uba pawnam ha ka bowling da kaba shim 4 wiket na ki 4 over bad u la ïoh ruh ïa ka nam ‘Man of the Match’.
Hynrei, hapdeng ka jingtied jong ka Ummulong SC, u slap uba jur u la pynsangeh ïa ka jingïalehkai hadien ba la poi sha ka 22.2 over. Hadien kumba shiteng kynta ka jingpynthut, ki umpire ryngkat bad ki captain jong ki ar tylli ki team ki la rai ban pyntreikam ïa ka DLS Method ban rai ïa ka jingïalehkai.
Katkum kane ka rukom kheiñ, ka Ummulong SC ka dei ban poi sha ka score 150 ron ha ka 22.2 over, hynrei ka la duna haduh 63 ron. Kumta, la pynbna ïa ka West Jaiñtia Police CC kum ka nongjop ha kane ka jingïalehkai.
Ha kawei pat ka jingïalehkai Quarter Final kaba lai kaban long lashai ka sngi, 28 tarik, ka The Legends (Lissi Pearl) kan ïakhun pyrshah ïa ka Wahiajer CS ha Khliehtyrshi Mini Stadium ha ka por 9:00 baje mynstep.
