Washington, Lber:
U President ka US, u Donald Trump, ha ka Sngi Palei u la kylla ktien noh na ka jingpynbna jong u ban phah leit hiar thma biang sha ki shlem treikam ba kongsan jong ka Iran, ha kaba, u la pynjlan ia katei ka jingthmu ban leit thombor sha Iran hadien ba u la pynbna ba u la ioh ban iakren bad ka Iran.
U Trump, u la kyntait kham mynshwa, ba u don ka jingkyrmen ban ïoh ïa ka jingïateh kular ban pynkut noh ïa ka thma Middle East, wat hapdeng ka jingkynthoh jong ka Islamic republic, halor ka jingthmu ïasuk jong ka America.
“Ki jingiakren ki dang ïaid shakhmat bad, wat hapdeng ki jingkren kiba bakla kiba pyrshah da ki Fake News Media, bad kiwei, ki ïaid bha bha,” la thoh u Trump ha ka rynsan ‘Truth Social’ jong u.
Ha ka Sngi Saitjaiñ ba la dep, u Trump, ha kaba nyngkong, u la ai por 48 kynta ïa ka Iran, ba kan plie ïa ka bynta ‘Strait of Hormuz’, kaba kongsan na bynta ki jhad kit umphniang, da kaba byrngem ban pynpra ïa ki jaka pynmih bording jongka, hynrei mynta, u la pynjlan ïa katei ka jingthmu da kaba pynbna ba un iai ap shwa katba ka Iran ka dang sngap ia ki jingiakren bad jingbthah jong u.
U nongmihkhmat jong u Trump, u Steve Witkoff, u la ïathuh ha ka jingïalang jong ka kynhun Myntri kham mynshwa ïa ki “dak kiba khlaiñ” ba ka Iran ka long kaba la khreh ban ïakren, da kaba pynshisha paidbah ha ka sien kaba nyngkong ba ka United States ka la mynjur ïa ka ‘Thup treikam’ ba don ia 15 tylli ki mat sha ka Iran lyngba ki heh jong ka Pakistan.
