Shillong, Lber 27
U Myntri Rangbah ka Jylla u Conrad K Sangma u la ong ba ka Sorkar Jylla ka pynlut kumba T.120 klur man la u snem ha ka ban siew ïa ka tulop jong ki nonghikai jong ki 4,500 tylli ki shlem ai jingstad lyngba ka Ad-hoc bad Deficit Grants System bad kdew ba ka Synod College ka dei kawei na kiba ïoh jingmyntoi na kane.
U la pynthikna ruh ïa ka jingkyrshan jong ka Sorkar kaba bteng, da kaba pynpaw ba ka Meghalaya ka pawnam napdeng ki Jylla jong ka thaiñ Shatei Lam-Mihngi na ka bynta ka jingkular jong ka ban kyrshan ïa ki jaka pule.
Ïa kane u Conrad u la pynpaw haba ai jingkren ha ka jingleit ïashim bynta jong u ha ka sngi ba pynkut ïa ka jinglehkmen ‘College Week 2026’ bad ka jingrakhe ïa ka ‘Diamond Jubilee’ jong ka Synod College Shillong ha ka jingïalang kaba la long ha madan Student Jaïaw, Shillong.
Haba pynkynmaw ïa ka jingïaid lynti jong ka Synod College u la ai ka jingïaroh, da kaba u la ong “Naduh ki jingsdang kiba rit, ka kolej ka la nangroi na ka por sha ka por, ka la ïarap ïa ki hajar ngut ki ki samla pule ha ka ban pynwan dur ïa ka jingim jong ki samla kiba don ïa ki jinglong Khristan kiba khlaiñ.”
U la kdew ba kane ka slem ai jingstad ka la ïalam ïa ki samla pule ban long ki nongshong shnong kiba don ka jingkitkhlieh bad kiba noh synñiang ruh sha ka imlang sahlang da kaba kynmaw ïa u J. D. Rymbai (bam kwai ha dwar u Blei) u ba la long ruh u Myntri Rangbah barim ka Jylla bad uba la pyndep ïa ki katto katne ki kyrdan pule na Synod College.
U Conrad u la ban jur ba ka pule puthi ka long kaba kongsan ha kaba u la pynpaw ba “Ka jingbei tyngka kaba khraw tam kaba ngi lah ban leh kum ka imlang sahlang bad kum ka Sorkar,” bad bynrap ba ka jingpule ka long “ka atiar kaba khlaiñ tam ban pynkylla ïa ka imlang sahlang jong ngi bad ban rah ïa ka Jylla jong ngi shakhmat.”
U Conrad u la kyntu ïa ki samla ban pdiang ïa ka seng kam seng jam, u la ong, “Man u snem, kumba 60,000 ngut ki samla kiba wad kam, hynrei tang kumba 1,000 haduh 2,000 tylli ki kam Sorkar kiba lait, yn leh kumno pat ïa ki 58,000 kiba dang sah?.”
U la ba jur da kaba ong, “Ka jubab ka shong ha ka jinglong nongseng kam seng jam” bad u la khot ïa ki jaka pule ban kyntiew ïa ka jingpynroi ïa ki sap bad ka jingpynmih jingtip kiba thymmai, da kaba pynthikna ba ka Sorkar ka long kaba kloi ban ai ka jingïatreilang ha kiba kum kine ki jingthmu.
