Shillong, Lber 27
Ka Hynñiewtrep Integrated Territorial Organization (HITO) Jaiñtia Hills hapoh ka jingïalam u Bah Khiejoit Niang, President bad u Bah Wanbun N Dkhar, General Secretary, ha ka 27 tarik u Lber 2026, ki la kyntu sha ki paidbah ba kim dei ban siew sha ki ‘toll gate’ kiba don ha Ialong, West Jaiñtia Hills District bad ha Lumshnong East Jaiñtia Hills District.
Kane ka jingkyntu ka seng sha ki paidbah ka long hadien ka jingjurip ïa ka National Highway-6 naduh Jowai shaduh Ratacherra, kaba la lap ba ki kompeni kiba pyntrei ïa kane ka surok hi kim pat dep ban trei katkum ba la mang.
Ka HITO ka la lap ruh ba yn dang shim por ban pyndep bad pynbha ïa katei ka surok baroh shilynter.
Katkum ki kyndon ka Ministry of Road Transports and Highway la kdew ba ka jingsiew sha ki ‘toll gate’ ka dei halor ka nongrim ban maramot ïa ki jingsniew ka surok hynrei katkum ka jinglap ka HITO la ong, ba baroh shilynter ka NH-6 ym pat ïahap ban shim khajna na ki kali kiba pyndonkam ïa kane ka surok.
Ha kajuh ka por ka HITO ka la ong ba ki nongpynïaid ka ‘toll plaza’ ruh kim lah ban pynbor ïa kiba ñiah kali ban siew haba ka surok kam shym la pat bha bad lada leh jubor kiba ñiah kali ki lah ban ujor sha ka Ministry of Road Transports and Highways.
Haba kren sha ki lad pathai khubor u Bah Khiejoit u la ong ba ka seng ka pynpaw ïa ka jingpyrshah ïa kine ki ‘toll gate’ kiba khrong khajna naduh ki kali kamai bad ki kali shimet namar haduh mynta ki por kane ka surok ka dangsah beit kumjuh khlem da shna pynbha.
Halor kane ka bynta ngin sa nangïai buddien bad lada sngap mynthi ngin sa thoh sha ka Ministry of Road Transports and Highways bad sha ka National Highway ba ki dei ban shimkam ïa kine ki kompeni ki bym shym la pyndep ban shna pynbha ïa ka surok.
