Bhubaneswar, Lber:
Shi sngi hadien ka jingleit pyndem wait hakhmat ki pulit ka Odisha, u Sukru, u heh nongïalam jong ka seng Maoist bad saw ngut kiwei pat ki ultra, ki la aiti ïa ki tiar ïaleh jong ki hakhmat u ADG Anti-Naxal Operations, u Sanjeeb Panda bad kiwei kiwei ki heh ophisar ha Phulbani, ha ka sngi Balang.
Ki la don baroh san ngut ki dkhot kiba la aiti noh ïa san tylli ki tiar ïaleh kynthup ïa kawei ka suloi AK-47, kawei ka Self-loading Rifle, ar tylli ki suloi .303, kawei ka suloi shot-gun bad ki tiar ïaleh kiba bun bha.
U Sukru u dei trai shnong na Malkangiri bad u dei u dkhot jong ka state committee jong ka CPI (Maoist) ba la khang pyrshah bad u rah ruh ïa ka buskit kaba T.55 lak.
Ki pulit ki la ïathuh ba kiwei pat ki saw ngut kynthup ïa lai ngut ki kynthei ki dei ki dkhot jong ka seng. Baroh kitei ki phra ngut ki la kit ïa ka khusnam pisa kaba kot sha ka 66 lak tyngka.
Katkum ka polisi pynbha jong ka sorkar jylla, ki Maoist kiba kit ha ka khlieh jong ki ïa ka buskit kaba palat ïa ka 5 lak tyngka ki lah ban ïoh ïa ka pisa ba la pyndap T.10 lak ha kaba u Sukru un ïoh ïa ka jingmyntoi pisa baroh kaba long T.65 lak katba ki saw ngut ki dkhot jong ka seng kin ïoh mar T.2.75 lak. Ki tiar ki kit ïa ka dor kaba long sa 7 lak tyngka.
Kane ka kynhun ka dei ka bynta jong ka tnad Kandhamal-Kalahandi-Boudh-Nayagarh (KKBN) division. Kitei ki dei kiba treikam ha Kandhamal distrik. U Sukru u la pynïasoh ha kane ka kynhun ha u snem 1997 bad u la trei shitom bha ha ki bynta jong ka Bansadhara-Ghumusar-Nagabali (BGN) bad KKBN naduh u snem 2007, la ong u Panda.
Hadien ka jingshah pynïap jong u dkhot jong ka komiti pdeng u Ganesh Uike ha Kandhamal ha u bnai Nohprah jong u snem ba la dep bad namar ka jingïaid beit bad ka jingbteng jong ki jingkhynra, ki lehnoh ki la shah pynjem khnap, ha kaba ki la hap ban rai noh ban leit pyndem bad ban ïasoh sha ka jingim kaba bha, u la bynrap.
Da ka jingaiti kaba dang shen, ka jingdon jong ki dkhot kiba treikam ha Odisha ka la hiar sha ka 8 haduh 9 ngut bad ka jingtreikam jong ki ka long tang ha ki katto katne ki jaka ha ka distrik Kandhamal.
Ka kynhun pulit SOG, DVF, CRPF bad ki BSF ki la don bynta bad kin sa ïai bteng ban pynlong ïa ka jingleit thwet lehnoh ha Kandhamal distrik, ong ki pulit.
U Panda u la ïaroh ïa ka jingtrei shitom jong u IG Operations u Deepak Kumar, u DIG u SIW u Akhileshvar Singh bad u SP u Kandhamal Harisha BC. U la pynthikna ba baroh ki Maoist kiba la aiti noh kin ïoh ïa ki jingmyntoi katkum ka polisi jong ka sorkar shen ban ïarap ïa ka jingïoh rung biang jong ki sha ka imlang sahlang da ka burom.
Haduh mynta, u Nuapada, Nabarangpur, Malkangiri, Koraput, Boudh, Bolangir, Rayagada bad Kalahandi ki la long kiba lait lut na ki Naxal.
U Panda u la ong, ki pulit ka Odisha ki thrang ban pynlong laitluid ïa ka jylla na ki Naxal haduh ka 31 tarik u Lber.
