Shillong, Lber 27
Ka Meghalaya ka la pyni ïa ka sap jong ka, ha kawei pat ka rukom ïalehkai martial art hadien ba ka la ïoh ïa ka nam lahduh jong ka Senior National Khelo India ASMITA Pencak Silat League 2025-26, kaba la long ha ka jaka ïalehkai jong ka Sports Authority of India (SAI) centre kaba don ha NEHU campus hangne mynta ka sngi.
Kane ka jingïalehkai kaba ar sngi ka la ïohi ïa ki nongïalehkai nangne ki la khur ïa ka khusnam da 2 tylli ki takma ksiar, kawei ka takma rupa bad kawei ka takma rnong ha baroh ar ki kyrdan ïalehkai combat (tanding) bad artistic (seni) bad ka la long ka dak kaba khraw jong ka jingjop na ka bynta ka Meghalaya Pencak Silat Association kaba dang khie dang san.
Ha ka kyrdan ïakhun, ka Khamtimon Rympei ka la ïakhun pyrshah ïa ka Monika Boro ha ka phainal jong ka thup 75-80 kg bad ka la pyni ïa ka jingkut jingmut kaba phylla ban jop ïa ka nam lahduh pyrshah ïa ka nongïakhhun pyrshah kaba kut jingmut bha ha kajuh ka kyrdan jingkhia.
Kawei pat ka takma ksiar la khur ha ka ganda (artistic pairs) da ka Ilashimti Klein bad ka Libia Matong, kiba la pynliem ïa ki kynhun na Uttar Pradesh, Nagaland bad na DNHDD na ka bynta ka kyrdan ba ha khlieh duh ha ka rynsan.
Kiwei pat ki takma la khur da ka Banrilang Muktieh kaba la rah ïa ka takma rupa ha ka kyrdan ïakhun kaba 60-65 kg, bad ka Promiseora Khymdeit kaba la khur ïa ka takma rnong ha ka kyrdan ïakhun U-45.
Kaba ar hadien ka Meghalaya ka dei ka Nagaland katba ka Jammu & Kashmir ka wan ha ka kyrdan kaba lai.
Kumba 300 ngut ki nongïashim bynta kynthei na ki 23 tylli ki jylla bad ki thaiñ (territories) ki la ïashim bynta ha kane ka lympung lehkai kaba ar sngi.
Ka ‘Pencak silat’ ka dei ka jait jingïalehkai jong ka Indonesia kaba dei ka bynta jong ka Asian Games bad ka lah ban shem ruh ïa ka jingpynrung ha ka National Games kaba 39, kaba ka Meghalaya kan pynlong ha u snem ban wan.
Ka ASMITA league ka dei ka jingthmu jong ka sorkar pdeng ban kyntiew, pynkhlain bad pynshlur ïa ki nongïalehkai kynthei na India ha ki jait jingïalehkai bapher-bapher. Ïa kane ka jingïalang kyrpang la pynlong da ka SAI, ka tnad Union Ministry of Youth Affairs and Sports, bad ka seng Indian Pencak Silat Federation bad ka seng Meghalaya Pencak Silat Association..
U kongsan ha kane ka sngi plie ïa kane ka jingïalehkai u dei u myntri jong ka tnad Sports and Youth Affairs u Bah Wailadmiki Shylla, bad u kongsan u dei u working president ka Meghalaya State Olympic Association u Shri John F Kharshiing. U kongsan ha kane ka sngi pynhap pyrda u dei u coach ka SAI u Jonathan Lalrinsanga.
