Shillong, Lber 27
Ka 1stShillong International Film Festival (SIFF), kaba la pynlong da ka Department of Information and Public Relations (DIPR) ka la poi haba kut noh da ka jingïashim bynta shitrhem jong ki samla pule, ki nongshna phlim bad ki riew ïeid phlim kiba mihkhmat ïa ki kolej bad ki skulbah bapher-bapher ha kylleng ka Jylla Meghalaya bad shabar ka Jylla Meghalaya.
Ha ka sngi ba pynkut ïa kane ka tamasa kaba lai sngi la sdang ïa ka jingïalang da ka jingai jinghikai u Dominic Sangma u nongshna phlim haba ïadei ki jingthoh, ‘screenplay’ uba la sam ïa ka jingshemphang jong u. Kane ka jingïalang ka la paw ba ka long kaba kordor na ka bynta ki samla pule bad ki nongshna phlim kiba kwah ban tei ïa ki kam ha ka kam shna phlim.
Ha kane ka prokram la pyni ruh ïa kiba bun ki phlim kiba pynpaw ïa ki jingmut bapher-bapher bad ki rukom shna ïa ki phlim. Ki phlim ba la pyni ki kynthup ïa ki phlim ‘Ade’ jong u Theja Rio, ka phlim ‘Roots Renewed’ jong u K. Mark Swer bad Tarun Bhartiya, ka phlim ‘By the Home’ jong u Mankap Nokwoham, ka phlim ‘Maimizial’ jong u Raymond Colney, ka phlim ‘Ahor’ jong u Kenny Lyngdoh, ka phlim ‘Impermanent Resident’ jong u Huu-Tuan Nguyen bad ka phlim ‘Shape of Momo’ jong u Tribeny Rai.
Ka bynta ba kongsan ha katei ka sngi pynkut ïa ka tamasa ka dei ka jingïakren halor ka phang “Streaming Stories, Shifting Screens: OTT platforms and Future of Cinema in Meghalaya and Northeast India” kata ban ïakren shaphang ka lawei jong ki jaka peit phlim kiba don ha ka Jylla bad ka thaiñ Shatei Lam-Mihngi baroh kawei.
Ki samla pule ka St Anthony’s College ,NEHU, MIT, EFLU bad kiwei-kiwei ki shlem pule, ki la ïashim bynta ha katei ka jingïakren bad kane ka ïarap ïa ki ban tip kham bniah shaphang ka ‘digital’ bad ka jingdonkam ka rynsan OTT ha ki jaka peit phlim kiba don ha ka thaiñ.
Ïa ka jingrakhe pynkut ïa ka SIFF la wan ban shim bynta da u Myntri ka DIPR u Bah Lahkmen Rymbui ryngkat u Director ka DIPR u B.S. Sohliya (IAS), ki heh jong ka tnad, ki nongshna phlim bad ki kongsan ba la khot kyrpang.
U Bah Lahkmen Rymbui haba ai jingkren u la ïaroh ïa ki nongwan shimbynta, ki nongshna phlim bad ki khynnah pule ïa ka jingshitrhem jong ki bad ka jingïadonlang jong ki naduh ba sdang haduh ba kut ka jinglehkmen da kaba ong ba ka jingthait jingjrem jong ki nongïashim bynta hadien ki lai sngi ba la pynlong ïa ka tamasa ka pynpaw ba ki aiti na ka bynta ka jingshna phlim.
U la ban jur halor ka jingdonkam ban don kum kane ka rynsan na ka bynta ki samla ba don ka sap ka phong bad ban pynshlur ïa ki ban ïakren bad kiwei ki briew kiba proh jabieng na kylleng ka Jylla Meghalaya, ka thaiñ Shatei Lam-Mihngi bad kylleng ka Ri. U la kdew ruh ïa ka jingdon jong ki sap ki phong hapdeng ki samla bad u la ong ba donkam ban ïarap, ban kyrshan bad ban kyntiew ïa kum kine ki sap ki phong.
Shuh shuh u Bah Rymbui u la ong ba ka Meghalaya ka don bun ki khana ba phylla bad ki jaka kiba itynnad kiba long kiba kongsan na ka bynta ban shna phlim. U la kyntu ïa ki nongïashim bynta ba kin long kiba shlur ban ïaid shakhmat.
Ha kane ka jingrakhe u kongsan ha katei ka sngi u la ai sngewbha ruh ïa ka song pisa sha ki nongjop ka SIFF Student Film Competiton. Ka phlim ‘Unau Hmei Hai’ jong u Stephen Malsawmsangna Renhsi kaba la ïoh ïa ka nam lahduh bad khur ïa ka song pisa ba T.50,000, ka phlim ‘The Paper Boat’ jong u Kyrshanborlang Khardewsaw ka la ïoh ïa ka kyrdan ba-ar ryngkat ka song pisa ba T.30,000 bad ka phlim ‘Ki Thied’ jong u Kyrshanborlin Wahlang kaba ïoh ïa ka kyrdan ba lai ryngkat ka song pisa ba T.20,000.
