Shillong, Lber 27
U Bah Titos Chyne uba dei u nongïalam Liang Pyrshah u la ïathuh ba ki MDC ka Liang Pyrshah ki kwah ban pynkylla ïa ka AD Rule bad dei ban ïaphylliew jingmut da baroh.
Kane ka jingpynpaw u Bah Titos Chyne ka dei hadien ba ki MDC Liang Pyrshah kim shym la ïoh ïakynduh ïa u Chief Executive Member ka KHADC, Bah Winston Tony Lyngdoh namar ba u slem ban poi sha ophis hadien ba ki la ap la kham slem.
Haba ïakren bad ki nongthoh khubor u Bah Titos u la pynpaw ka jingsngewkhia hadien ba ïa ka bill jong ka GHADC, u Lat ka Jylla u la dep mynjur tang hadien katto katne sngi.
U la ong ban pynkylla ïa ka AD Rule, donkam ban ïaphylliew jingmut namar ha KHADC ki don bun tylli ki jaidbynriew riewlum.
U la ong ba ha u 2018 ha ka por ba long CEM u Bah HS Shylla la pynkylla ïa ka AD Rule sha ka Khasi Hills Autonomous District Rule namar ka AD Rule kadei ka Assam District Rule kumta ki kwah ban nym mih shuh Assam.
U la ïathuh ha EC ba ïalam ma u ki la kren ïa ka Sorkar namar ka la sahkut ha DCA bad ka Sorkar ka la pan jingshai bad ka EC ruh ka la ai jingshai.
U la ong biang katba dang don ka bill ha Sorkar ym pat lah ban wanrah bill thymmai hynrei ka shong ha ka EC la kan phah pynphai ne kan shna bill thymmai.
U la pynkynmaw ba ka jingbym pdiang ka Sorkar ka dei ba ka shimpor ka Expert Committee ban peit bniah namar ka jingpynkylla ïa ka AD Rule ka long baroh kawei.
Kumta u la ong ba ka jingkwah ïakynduh ki MDC Liang Pyrshah ïa u CEM ban sngewthuh namar lada ka EC kam pat don jingpyrkhat kan buh jingeh ïa ka jaidbynriew hadien.
