Shillong, Lber 27
U Bah H. Bansiewdor Nonglang, Chairman ka Greentech Foundation u la pynpaw ïa ka jingbynñiaw bad pyrshah ïa ka Sorkar lyngba ka tnad Tourism ban ai ka jaka kaba 66 akar ha Umiam sha ka Indian Hotels Company Limited (IHCL) Tata Group ban shna ïa ki jingtei ha katei ka jaka.
Ïa katei ka jaka haduh 66 akar la shu ai sha katei ka kompeni ban shna ïa ki jingtei ha katei ka jaka ha ka jingïateh kaba 60 snem.
Haba kren sha ki lad pathai khubor ha ka sngi Thohdieng jong ka taïew, u Bah H. Bansiewdor Nonglang u la ong ba ka Greentech Foundation ka la wad bniah lyngba ki Right To Information (RTI) na ki ophis bapher-bapher kiba kynthup sha ka ophis DC Ri-Bhoi bad DC East Khasi Hills shapoh ka Revenue and Disaster Management, sha ka tnad Forest, sha ka Tourism Department bad sha ka Meghalaya State Pollution Control Board (MSPCB), hynrei haba na ka liang ka Foundation ka la pyrshang ban lum ki don ki tnad kiba la kyntait war ba kim don jaka ha Umiam bad na ka MeECL ruh ka la kyntait ba ka don jaka.
Shuh shuh u la ïathuh ba lyngba ka jingwad jingtip RTI na ka Meghalaya State Pollution Control Board (MSPCB) la ïathuh shai ba ïa ka dewlynnong Lumpongdeng ha Umiam ruh la ai lang sha ka kompeni Tata Group.
U la ïathuh ruh ba ka Sorkar ka la thaw da ki kyndon ba ïa kino-kino ki jingtrei kiba ktah ïa ka Umiam dei ban pynsangeh bad yn nym shah ïano-ïano ruh nangne sha khmat ban mih kino-kino ki jingtei kiba lah ban buh jingma ïa ka Umiam, hynrei kaba sngewlyngngoh ba na ka liang ka Sorkar ka wanrah syndon dalade ïa ki kompeni ban wan tei ïa kita ki 5 Star Hotel, ki Resort bad ki Restaurant ha Umiam.
U la ong ruh ba katkum ha ka RTI ba la paw kaba la ïoh pdiang na ka MSPCB, ka Sorkar hi ka la pynkheiñ ïa ki kyndon kaba la shna hi, kata ka Meghalaya Water Bodies Prevention and Conservation Guidline 2023, kaba khanglad ïa ki jingthmu pynjot ïa ki jaka langum, da kaba tei ïa ki jingtei kiba heh.
“Lada tei ïa ki jingtei ha ka dewlynnong Lumpongdeng kan don ka jingpynkhyllem dieng, kan don ka jingtwa khyndew bad kan sa ktah ïa ka ‘hydro project’ kaba heh tam hapoh ka Jylla kaba don ha Umiam,” la bynrap u Bah H. Bansiewdor.
