Jerusalem, Lber:
U nongialam ka liang pyrshah jong ka Israel, u Yair Lapid, u la kynnoh ba ka sorkar Israel ka la pynngam jyllop hi da lade – ia lade namar ka jingduna jong ki shipai iapom.
“Ka IDF ka la tam u pud shaba palat. Ka sorkar ka iehnoh ïa ki shipai kiba la mynsaw ha madan thma,” ong u Lapid ha ka jingpynbna ha ka prokram TV, da kaba pynkynmaw ïa ka jingmaham ba shisngi mynshwa da u heh shipai- Lieutenant General Eyal Zamir sha ka kynhun Myntri pahara.
“Ka sorkar ka phah ia ki shipai iapom sha madan thma khlem ka buit, khlem ki lad- ki lynti kiba biang bad da ki shipai kiba dang duna palat,” la ong u Lapid.
Ki lad pathai khubor ki la shim ia ka jingong jong u Zamir ha ka kynhun myntri ba pahara ba “ka IDF ka don hapdeng ka jingma jong ka jingkhyllem noh”.
Haba kynthoh halor ka jingduna ki shipai ha ka jingïalang lyngba ka telebishon ha ka Sngi Palei, u nongrah ktien jong ka tnad shipai, u Brigadier General Effie Defrin u la ong ba ka Israel ka donkam shuh- shuh kham bun ïa ki shipai iapom ha ki bynta bapher, khamtam eh ha Lebanon.
U Lapid u la khot ban pynrung kam shuh-shuh ruh ia ki shynrang na ka jaitbynriew Haredi kaba dei ka ultra-Orthodox, kiba naduh ba la thaw ia ka Israel ha u snem 1948 ki la shah pyllait na ka kam shipai.
Ka jingshakri bad jingiada ia ka ri, ka long kaba donkam ha Israel, hynrei hapoh ka hukum ba la buh ha ka por ba la thaw ia ka ri, ha ka por ba ki ultra-Orthodox ki dang long ka jaitbynriew kaba rit bha, ia ki shynrang kiba aiti lut ia lade ha ka jingpule ia ki kot ba kyntang jong ki Jiw la ai ia ka pass ‘de facto’.
