Shillong, Lber 27
Ka Sorkar Meghalaya ha ka Sngi Thohdieng ka la soi ïa ka soskular jingïateh ne ka Memorandum of Understanding (MoU) bad ka National Jal Jeevan Mission (NJJM), Department of Drinking Water & Sanitation hapoh ka tnad Jal Shakti ka Sorkar Pdeng na ka bynta ban pyntreikam ïa ka ‘Jal Jeevan Mission 2.0’, ban buh ïa ka saiñdur ha ka ban pynïar ïa ka jingpynïasoh kor um (ba treikam) sha man la ki ïing ki sem nongkyndong ha kylleng ka Jylla.
Ïa kane ka jingïasoi la pynlong ha ka jingïadon lang u Myntri Rangbah ka Jylla, u Conrad K. Sangma bad u Myntri Sorkar Pdeng ka tnad Jal Shakti, u C.R. Patil, uba la ïashim bynta lyngba ka ‘Online’.
Ha kane ka sngi la donlang ruh u Myntri Khynnah, u V. Somanna, u Secretary ka tnad Drinking Water Sanitation, u Ashok K.K. Meena, u Additional Secretary & Mission Director ka NJJM, K.K. Soan lem bad kiwei-kiwei ki ophisar na ka tnad Jal Shakti jong ka Sorkar Pdeng.
Na ka Sorkar Meghalaya, la mihkhmat da u Marcuise N. Marak, Myntri ka tnad PHE; Pravin Bakshi, Commissioner & Secretary, PHE-cum-Mission Director, JJM, Meghalaya; Bah R.S. Nongbri, Chief Engineer ka tnad PHE, Meghalaya kum u nongsakhi bad u Bah D. Shabong, Superintending Engineer ka tnad PHE, Meghalaya.
Ha ka jingkren jong u, u Myntri Rangbah u la pynpaw ka jingsngewnguh halor ka jingsoi ïa ka MoU bad ban jur ïa ka jingangnud jong ka Sorkar Jylla ban pyntikna ïa ka jingïoh jong ka umbam-umdih kaba shngaiñ bad kaba neh sha man la ki longïing hapoh ka Jal Jeevan Mission.
U la ai khublei ruh ïa ka Sorkar Pdeng na ka bynta ka jingkyrshan bad ong, “ka jingkynthup lang mynta ka la kiew napdeng kiba duna tam sha ka 83%.”
U la kyntu ïa ka jingkyrshan kaba ïai bteng, da kaba bynrap, “Ngi dei ban pyntikna ïa ka jingpynbiang um na ka bynta baroh, kynthup ïa ki longïing kiba beit ba ryntih ha ki kam ki jam.”
U la pynpaw ruh ïa ka jingdonkam jong ka polisi um kaba pura bad ban jur halor ki jingpyrshang kiba dang ïaid shakhmat ban pynthymmai ïa ki tyllong um ha kylleng ka Jylla.
U la kdew ba ïa ki jingeh kiba ïadei bad ki tyllong um la shimkhia ha ka rukom kaba pura, da kaba pynleit jingmut ha ka jingpynneh-pynsah bad ka jingktah ka ban neh slem.
U Myntri Rangbah u la ong shuh-shuh ba ka Sorkar Jylla ka shim ïa ka jingkitkhlieh ban pynbeit ïa ki jingeh kiba ïadei bad ka jingdon bad jingpynïaid ïa ka um, khamtam eh kito kiba ïadei bad ka jingpynneh-pynsah ïa ki tyllong um, lyngba ka jingthmu kaba ïatreilang bad ka jingpyntreikam.
Na ka liang u Myntri Sorkar Pdeng ka tnad Jal Shakti, u C.R. Patil, ha ka jingkren ba kongsan jong u, u la ban jur ba lymda ka umbam-umdih ka poi shaduh ka jingbuh thong jong ka bynta ba khatduh, ka jingthmu jong u Myntri Rangbahduh ka ri na ka bynta ka ‘Viksit Bharat’ kan ym lah ban urlong pura.
U la pynpaw ba ka Sorkar India ka la buh hakhmat eh ban pyntikna ba ïa ki prokram kiba hap hapoh ka Jal Jeevan Mission la pyntreikam ha ka rukom kaba dei, da kaba pynleit jingmut ïa ka jingtreikam bad ka jingmih na ka.
U la pynpaw shuh-shuh ïa ka jingdonkam ban pynïasohlang bad kiwei pat ki skhim kum ka jingthmu jong ka G-RAM-G bad ki prokram ba ïadei ban pynkhlaiñ ïa ka jingpyntreikam bad ban pynjur ïa ka jingïoh bynta ha ki shnong ki thaw.
Kane ka MoU ka pyni ïa ka jingkular kaba thymmai bad ka jingïatreilang kaba skhem hapdeng ka Sorkar Pdeng bad ka Jylla na ka bynta ka jingpyntreikam hok ïa ka ‘Jal Jeevan Mission 2.0’.
Kane ka mishon ka thmu ban pynbiang ïa ki jingpynïasoh kor-um (Functional Household Tap Connection – FHTC) sha man la ki longïing nongkyndong, ban pyntikna ïa ka jingïoh ïa ka umbam-umdih kaba shngaiñ, kaba biang, bad kaba lah ban neh.
