Washington, Lber:
Ka United States, ka thmu ban phah kumba 3,000ngut ki shipai na ka elite 82nd Airborne Division sha Middle East ban kyrshan ia ki kam pyrshah ia ka Iran, la iathuh ki lad pathai khubor jong ka US ha ka Sngi Ba-ar. Kitei kin iasoh lang bad ki hajar ngut ki shipai duriaw, kiba dei ban poi sha Middle East ha kane ka Sngi Thohdieng, kaba dei ka por ba khadduh eh, kaba la buh da u President Donald Trump, ia ka Iran, ba kan plie ia ka duriaw bah Hormuz, ong ka kot khubor jong ka Wall Street Journal.
Ym pat shym la shim ia ka rai ban buh shipai ha ka jaka, la iathuh ka Journal, da kaba kdew ia arngut ki heh jong ka US kiba la ong ba la khmih lynti ia ka jingthoh hukum halor katei ka jingpynpoi ha ki kynta ban wan. Hynrei ki jingpynkynriah kam ki mut ba ki kynhun jong ki shipai khyndew jong ka US kiba la pynkhreh bha ban ïaleh thma kin sa don shen ha katei ka thaiñ.
Ka 82nd Airborne Division ka lah ban leit sha kano kano ka jaka ha ka pyrthei hapoh 18 kynta bad ka long kaba tbit bha ha ka “jinghiar thma da kaba rung jubor da ki parachute” kiba plie lad ia ki kam shipai kiba bud, ong ka website jong ka.
Ka The New York Times ka dei kaba nyngkong eh ban ai khubor ha ka sngi Nyngkong ba ki heh shipai ki dang bishar bniah ïa ka jinglah ban pynpoi ïa ka kynhun ïalehkai na ka 82nd Airborne bad katto katne ngut ki nongtrei jong ka kiba thmu bad pynpoi ïa ki mar ki mata sha ka thma kaba dang ïaid shakhmat jong ka US bad ka Israel pyrshah ïa ka Iran. Kito ki shipai lane ki dkhot jong ka 31st Marine Expeditionary Unit kiba la don lypa ha lynti “ki lah ban pyndonkam ban kurup ïa ka Kharg Island,” ka jaka shalan umphniang jong ka Iran, ong ka Times.
“Ka jingkhih jong ka 82nd ka plie lad ïa u President Trump ban pyrshang ban plie biang ïa ka duriaw Hormuz da ka bor, ban kurup ïa ki dulir ba kongsan jong ka Iran ne ki rud duriaw lane ban sdang ïa ka kam ban kurup ïa u uranium ba la pynriewspah bha jong ka sorkar lada u jied ban leh kumta,” ong ka Journal.
U Trump u dang pynbor ïa ki kam shipai pyrshah ïa ka Iran wat haba u dang bishar bniah ïa ki lad jingïadei kiba la shem thymmai, ong ka White House ha ka Sngi Ba-ar, hadien ba u president jong ka US u la pynbna ïa ka jingïakren bad ka Tehran bad ka Pakistan ka la paw kum ka nongpynïasuk kaba lah ban long.
