Washington, Lber:
Uwei u nongbishar na kawei ka nongbah jong ka ri America, u la shah pynngat hapoh ki kyndon pynkheiñ aiñ hadien ba la lap ia ka jingdon kti jong u ha ki kam be-aiñ haba iadei bad ka jingbei pisa be-aiñ hapoh ka nongbah Texas. Utei u briew u long u nong India uba nyngkong eh ban ioh long kum u nongbishar hapoh Ford Bend.
Katkum ka kaiphod jong ka Fox 26 Houston, la iathuh ba u KP George u la shah rai pynrem hapoh ki kyndon pynkheiñ aiñ kiba hap hapoh ka ‘Third Degree Felony’ bad u lah ban shah set patok haduh shiphew snem kynthih. Nalor kata, la pynbna ba yn weng noh syndon ruh ia u na ka kam hadien ba la dep ban ai jingpynshitom ia u.
U KP George u la shah rai pynrem namar ba u la phah ia palat $46,000 na ka pisa ilekshon sha ka account shimet jong u, ka kam be-aiñ kaba ki nongïasaid aiñ jong u, ki la pynksan ba kane ka jingleh jong u ka long tang ba un ioh ban siew pyndep noh ia ki ram- ki shah kiba u la shim ha katei ka por ilekshon, hynrei ka kynhun bishar ka shim beit ba kane ka dei ka kam runar bad kaba long ruh ka jingpynkheiñ aiñ kaba jur khamtam ba u long u briew jong ka aiñ hynrei uba leh pynkheiñ hi da lade.
Ka nongïarap jong ka nongïasaid aiñ jong ka District, Katherine Peterson, ka la ong ba u George u la shu thok ha ki kaiphod pisa ha ka jingïalap elekshon bad u la pyndonkam ïa ka pisa na ka bynta ka “jingmyntoi shimet” jong u. Ia ka pisa jong ka jingialap la pynkynriah sha ki account shimet bad la pyndonkam ruh na ka bynta “ka jingsiew kali bad kiwei kiwei ki jinglut shimet”. Ki la don ruh ki jingïadei pisa kiba la ktah ïa ki jylla kiba bun, kum kito kiba ïadei bad ki jingkheiñ jingdiah kiba don ha Delaware bad ki jingthoh kiba ïadei bad ka Massachusetts.
Ki sakhi ki pyni ba u George u la shim pisa kham bun ban ia kaba u dei hok ban ioh, hynrei ka liang pyrshah ka la pynskhem ba ia ka mukotduma la tei halor ki “jingthoh ki bym biang bad ki jingmut kiba bakla.”
Da kaba batai ia ka jingshah pynngat kum ka nuksa jong ka “jingleh palat jong ka sorkar”, ka kynhun iada ka la kynthoh ba “Ym don sakhi ba u George u la pyndonkam ia ka pisa be-ain” bad ka la pynskhem ba ka jylla ka la “lah ban pynshisha ia ka jingthmu ban leh thok”. Ki la ban jur ba ki kyrtong ki don ka jingbit katkum ka ain ban ai ram pisa sha la ki jong ki jingialap elekshon bad hadien kin siew kylliang hi dalade.
Katkum ka jingïada, ki nongtohkit ki la iehnoh ïa ki jingmut ba kongsan, da kaba kdew ba “ka jingtohkit ka la iehnoh ïa ki jingtip kiba kongsan” bad kdew ba ïa ki jingthoh pisa na ki jingïakhih elekshon ba mynshuwa ym shym la bishar bniah satia. Ha ka jaka kata, ki la ong, la tei ia ka mukotduma halor ki jingtip kiba rit bad kiba la jied bha.
Ka kaiphod ka la ong ba la kem ia u George mardor hadien ba la pynmih ia ka rai hynrei hadien la pyllait noh ia u hadien ba la buh ia ka bond kaba $20,000. Kum ka kyndon ban pyllait noh ia u, u la aiti noh ia ka passport US jong u.
U la jied ba ka nongbishar jong ka District ka Maggie Jaramillo kan rai ia ka jingpynshitom jong u ban ia ka kynhun bishar. Ka bynta ban pynshitom la buh ban long ha ka 16 tarik u Jylliew, jong u snem 2026.
