Shillong, Lber 29
U Myntri ka tnat ïalehkai ka Sorkar Jylla u Bah Wailadmiki Shylla u la ai khublei halor ka jingjop ka Anrisha Klein kaba la khur ia ka takma rnong ha ka 1st Indoor Athletic Cham -pionship 2026 kaba la kut ha ka taïew ba la lah ha Bhubaneswar, Odisha.
“Nga ai khublei ïa ka Anrisha halor ka jinglah ban ïalehkai bha jong ka ha ka rynsan ïalehkai jong ka ri bad kane ka long ka jingsarong ïa ka jylla hi baroh kawei,” la pynpaw utei u Myntri ha rynsan social media ha ka sngi Saitjaiñ.
U la ong ba kane ka jingïalehkai bha jong ka ha kiba bun tylli ki lympung ïalehkai ka pynpaw ïa ka jinglenlade, ka jinglong ryntih, bad ka mynsiem ieid jong ka ïa kane ka jingïalehkai. “Te kumta nga kyrmen ba lyngba kane ka jingjop kan long ka jingai mynsiem ïa kiwei pat ki nongïalehkai jong ka Jylla ba kin long kiba trei shitom ryngkat ka jingkut jingmut khnang ba ha kawei ka sngi kin sa lah ban kynjoh sha ka thong,” u la bynrap da kaba ai ruh ka jingkitbok kitrwiang ïa katei ka ‘thei ïalehkai na Ri Bhoi District ba kan nangkiew shaphrang ha ki sngi ban wan ha ka kam ïalehkai jong ka.
Kumba ka paw ka Anrisha kaba dangdon ha ka jingshah pyntbit hapoh ka shlem ai jinghikai jong ka SAI Training Centre Shillong, ka la long tang marwei kaba la leit shim bynta ïa ka Jylla ha katei ka lympung bad ka la lah ban pynpaw ïa ka jingtbit da kaba khur ïa katei ka takma ha ka U-20 High Jump da kaba kynthih ha ka jingjngai kaba 1.60 mitar.
Lah ban kdew ka Anrisha ka la khur ruh ïa ka takma rnong ha ka High Jump U-20 jong ka 36th East Zone Junior Athletics Championship 2025 kaba la long ha Ranchi da kaba ka la lah ban kynthih ha ki 1.51 mitar. Kumjuh ïa ka takma rnong ha ka U-18 jong ka 34th East Zone Athletics Championship 2024 bad takma rupa ha ka U-20 jong ka 35th East Zone Junior Athletics Championship 2024.
