Shillong, Lber 29
Kumba don ka kyntien kaba ong ka jingkoit jingkhiah ka long ka spah bah ha ka jingim briew ha kane ka pyrthei, ka Deputy Commissioners ka East Khasi Hills District ka la kyntu ïa ki nongshong shnong ba ki dei ban shim ïa ka jingai injek tika ba kan long ka jingïada na kino-kino ki jait jingpang.
Ïa kane ka Kong R.M Kurbah ka la pynpaw haba ai jingkren ha ka jingïalang plie ïa ka Umthli Sub-Centre kaba hap hapoh ka Khatarshnong Laitkroh C&RD Block, East Khasi Hill District.
Ka Kong R.M Kurbah ka la ong, ka jingai ïa ki injek tika ka long ka lad ban ïada na ki jait jingpang kiba ymlah ban tip lane kita ki jait jingpang ba la tip kum ki ‘Noncommunicable Disease’ ba kum kine ki jait jingpang ki lah ban shim ruh ïa ka jingim jong ki briew.
Ka la ong, lyngba ka jingwan jong ka Sub-Centre hapoh jong ka shnong kan long ka jingmyntoi ïa ki nongshong shnong ba kin shim ïa kita ki lad jingïada bad ruh ba kin lah ban bud ryntih ïa kita ki kyndon jong ka koit ka khiah ba la buh da ka Sorkar.
Shuh-shuh ka la batai haba ïadei ka jingpang mih niangblei, da kaba ong ba ka dei ka jingpang ban hap ban sumar bha khnang ba kan nym ktah ïa ka jingmut jingpyrkhat jong ki khyllung, ki khynnah bad ban lait na ka jingkhlad jong ki khyllung, da kaba ka la ong, lada la dep ban ai ïa tika ïa ki khyllung kan ïada ïa ki na kaba sniew bad ki jingpang kin ymlah ban ktah than.
Ka la kyntu ïa ka Village Health Councils (VHCs) jong ka shnong Umthli ba kan shimkhia ha ka ban pynlong ïa ki prokram ban pynsngewthuh paidbah ïa ki nongshong shnong halor ka koit ka khiah bad ba kumno ki longkmie, ki khun samla bad ki rangbah ruh kumjuh ba kin nang ban ïada ïalade bad ïa ka shong ka thaw.
