Shillong, Lber 29
Ha ka miet jong ka sngi Saitjaiñ, ki pulit ka East Khasi Hills kila pynlong ïa ka jingkhynra ïa ka kam khaïi met ha kylleng ki jaka jong ka Sor Shillong bad ha kane ka jingkhynra la rah noh ïa 16 ngut ki ‘thei ba ïaid kam die met kynthup ïa 4 ngut ki pimp ne agent (ki briew kiba ïapynbeit bad ki nongleh kam awria).
Ha ka kyrwoh khubor ba la pyllait da u Super-intendent of Police ka East Khasi Hills Bah Vivek Syiem, la ong ba ïa kane ka jingkhynra la pynlong halor ka jingïoh pdiang ïa kiba bun ki jingujor na ki nongshong shnong ba ki nongtrei kam awria (sex workers) kila treikam na ki jaka bapher bapher kiba don marjan ki jaka leh niam kata ki Iingmane/Gurudwara bad kumjuh ruh halor ka jingnang kiew ka jingdon ki briew kiba don ïa ka jingpang HIV ha Shillong.
Ïa kane ka jingkhynra la pynlong ha ki bynta ka surok na Khyndailad Pegasus Hotel sha Presbyterian English Service Church mar pyrshah ka SBI Main Branch, Shillong, nalor ki bynta ka surok mar pyrshah ka ophis MBoSE, Lachumiere, Shillong bad IGP Point.
U Bah Vivek u pyntip ba ïa kane ka jingkhynra la ïalam da u Additional SP (Operation) Bah Ivan Diengdoh, bala synran lang da ka Dy SP WCC Kong Jyoti Wahlang, OC ka thanad Sadar, O/C ka Women Police Station ka Laitumkhrah bad kiwei ki ophisar ka District. Ha kane ka jingkhynra, 16 ngut ki briew kila shah rah na kitei ki jaka bala kdew haneng katba ki dang leh ïa ki kam kiba dei ki kam die met bad kam awria. Saw ngut na kiba shah rah ki dei ki pimp/agent kiba pynsuk bad pynwad briew (shynrang) na ka bynta ka kam leh awria, kiba shim ïa ka bynta ba kongsan ha ka jingpynbeit ïa kane ka kam bymman.
Ki Pulit kila kurup ruh ïa kawei ka Swift Dzire bad 2 tylli ki arshaka kiba la pyndonkam ha kane ka kam bymman. Ki pulit kila register ïa kane ka case ha thanad Sadar hapoh ka kyndon 4/5/7/8 The Immoral Traffic (Prevention) Act pule lang bad ka kyndon 110 jong ka Meghalaya Police Act pyrshah ïa kine ki briew.
