Shillong, Lber 29
Ka Seng Longkmie Rngi Shillong ryngkat ka jingkyrshan jong ka VPP Youth Wing ha ka sngi U Blei ki la leit ban khynra naphang bad ban rad diengkhong ïa ki kam sniew, khalai, kam die kyiad beaiñ ha Lum Shyllong.
Ka VPP Youth Wing ka la leit ai jingkyrshan ïa ka Seng Longkmie ha ka sngi U Blei ka 29.3.2026 ban khynra ha Lumshyllong, bad haba leit khynra la lap bun ki nong khalai, ki nongdie kyiad beaiñ, ka ktem stock kyiad jong ki briew sha khlaw, ka jinglong ishyrkhei jong ka jaka, ka jingbun ki kali ba ïeng ban ïaleh ki kam sniew harud surok.
Ym tang ba kynrei ki kam sniew, hynrei ka pynwit ruh ïa ka ïaid ka ïeng ki kali, ki paidbah ba leit ba wan na katei ka surok. Ka buh jingma ruh ïa ki nongshong shnong bad ïa ka imlang sahlang namar ki briew kiba donkti ban ïaleh ïa ki kam sniew ki ïashong bun bha bad haduh da miet khamtam sngi Saitjaiñ, sngi U Blei, ki ju wan pynlut por ha utei u lum ban ïadih ïabam bad kren ki ktien khlem akor kaba pynwit bad pynsyier ïa ki paidbah ba ïaid ba ïeng.
La ong ba kiba bun ki riew paidbah, ki Seng Longkmie kiba la ud la nam sha ka VPP youth wing, haba leit khynra hi teng teng ki longkmie ki ju shah ñiew beiñ bad shah beh krad kylla, kumta ka VPP youth wing kam banse ban mih shakhmat ban ai jingkyrshan ïa ki seng longkmie ban rat diengkhong ïa kine ki jingsniew.
Ka Youth Wing ka maham da kaba tyngeh bad kyntu ïa ki briew ba ju mlien kine ki kam ba ki dei ban sangeh syndon kine jait kam, bad kim dei ban pyni ïa kine jait akor kine jait kam beaiñ namar kato ka jaka lum shyllong ba bun bha ki briew ki tourist ki wan kai. Kyntang ïawai ka VPP youth wing bad Seng Longkmie ka maham jur bad lada lap biang kum kine kan leh da kaba tyngeh bad kan nym aili ne map ïa kum kine ki jait kam beaiñ ba kin don hapoh Lumshyllong bad kan dang ïai bteng ban khynra na ka por sha ka por.
