Shillong, Lber 28
U Myntri Rangbah ka Jylla, u Conrad K. Sangma ha ka Sngi Saitjaiñ u la plie ïa ka jingrakhe dap 150 snem jong ka Dorbar Shnong Lawjynriew ha ka prokram kaba la pynlong ha Madan Phutbol, Lawjynriew, Nongthymmai.
Ha kane ka sngi la don lang ruh u Myntri ka tnad pule-puthi, Bah Lakhmen Rymbui, MLA ka Nongthymmai, Bah Charles Pyngrope bad Chief Executive Member ka KHADC, Bah Winston Tony Lyngdoh.
Haba ai jingkren, u Myntri Rangbah haba pynpaw ïa ka jingkmen ban ïashim bynta ha kane ka sngi kaba kongsan bad ka ban sah kynmaw jong ka jingrakhe dap 150 snem jong ka Shnong Lawjynriew u la kner ïa ka jingai khublei ba kyrpang sha ka imlang-sahlang jong ka Lajynriew bad bynrap, “Ka jingkmen jong ka jingpdiang sngewbha ha ka rukom tynrai jong ki Khasi, ki jingïashim bynta baitynnad ha ka liang ka kolshor bad ki jingpyni lyngba ki jingbatai bniah kaba ngi sakhi mynta ka sngi, ka kdew ïa ka pateng bariewspah bad ka jingïatylli jong kane ka shnong. Ka long ka jingpynkynmaw kaba sngew sarong ïa ka jaidbynriew.”
U la ong shuh-shuh ba ka khana shaphang ka Lawjynriew kam dei tang ka khana shaphang kawei ka shnong hynrei ka khana kaba ïasnoh bha bad ka jingroi ka nongbah Shillong bad ka histori jong ka Jylla.
“Naduh ki sngi ba sdang jong ka hapoh ka jingsynshar tynrai jong ka Hima Mylliem haduh ka jingpynrung kyrteng pura ïa ka jaka ha u snem 1876, kane ka shnong ka la ïeng ha ka jingtynjuh jong ka por,” u la ong bad ai jingïaroh ïa ki nongshong shnong ka Lawjynriew kiba la pynneh-pynsah ïa ka jinglong kyrpang katba ki dang pdiang ïa ka jingkylla.
U Myntri Rangbah ka Jylla u la ong ruh ba ka pateng jong kane ka jaka ka nang riewspah shuh-shuh da ka jingïadei jong ka bad ki shlem treikam kiba kongsan bad ka jingsynñiang jong ka sha ka pule-puthi bad ka roi ka par ha ka imlang-sahlang kaba ïeng kum ka dak jong ka jingïatylli, ka jingïalong kawei, bad ka jingkiew shaphrang.
Halor ka bynta jong ki shnong ki thaw bad ki shlem treikam ha ka imlang-sahlang, u Myntri Rangbah u la ong ba ka rukom treikam jong ki Dorbar Shnong ka ïai bteng ban don ïa ka bynta kaba kongsan.
“Kine ki shlem treikam tynrai ki long ki païa kiba skhem jong ka synshar-khadar ha ki shnong ki thaw, kaba pyntikna ïa ka jingïashim bynta lang jong ki paidbah, ban pynneh-pynsah ïa ki riti-dustur, bad ban pynneh ïa ka jingïatylli,” u la ong bad ïaroh ïa u Rangbah Shnong bad baroh ki dkhot jong ka Dorbar halor ka jingaiti lut bad ka jinglong nongïalam jong ki.
Shuh shuh, u Myntri Rangbah ka Jylla u la pan ïa ka jingïatreilang jong ka shnong haba ïadei bad ki projek pynroi bapher-bapher jong ka bad ki prokram ba la pynïaid da ki paidbah.
Haba pynskhem biang ïa ka jingkular jong ka Sorkar ban kyrshan ïa ki imlang-sahlang ha ka jingïaid lynti jong ki ha ka roi ka par, u la pynbna ïa ka pisa kaba T.30 lak na ka Chief Minister’s Special Development Fund sha ki jingdonkam jong ka shnong.
Na ka liang u Myntri Rangbah, u la plie paidbah ruh ïa ki katto-katne ki projek jong ka Dorbar Shnong Lawjynriew kiba kynthup ïa ki CCTV, 8 tylli ki ‘Location Signage’ ha kylleng ka shnong, ka jingpyllait paidbah ïa ka ‘Website’ bad ka ‘Dashboard’ jong ka shnong.
Ha kane ka sngi, u Myntri Rangbah u la pynkup burom ruh ïa ki nongïalam bad ki ‘riew rangbah kiba paw bad kiba donburom jong ka shnong.
