Bengaluru, Lber:
Ka sorkar Japan ka la kular ban ai ram na ka bynta ka roi ka par (Official Development Assistance) kaba long JPY 275.858 billion (kumba T.16,420 klur) ban bei tyngka ïa ki saw tylli ki projek ba kongsan ha India, kiba kynthup ïa ka leit ka wan ha sor, ka koit ka khiah, bad ka rep ka riang.
Katkum ka jingïathuh jong ka tyllong khbor, la ong ba kine ki projek ki dei ban pyntreikam ha ki jylla jong ka Punjab, Karnataka, bad Maharashtra, katkum ka jingpynbna ba thikna jong ka tnad pla tyngka.
Ïa ki jingthoh la ïa bujli ha ka 24 tarik u Lber hapdeng u Alok Tiwari Joint Secretary ka tnad Economic Affairs jong ka tnad pla tyngka jong ka sorkar India bad u Keiichi Ono uba dei u nonlam ktien jong ka Japan sha India.
Katkum ka tnad pathai khubor, la ïasoi ruh ïa ki jingïateh kular ban ai ram hapdeng ka Sorkar India bad ka Japan International Cooperation Agency (JICA).
Kat kum ka jingpynlait khubor, ka Bengaluru Metro Rail Project (Phase 3) (I) ka thmu ban weng ïa ka jingdawa kali kaba nang kiew ha ka thaiñ Bengaluru Metropolitan Region da kaba pynheh ïa ka rukom kit paidbah kaba stet. La khmih lynti ba kane ka projek kan kyntiew ïa ka roi ka par ha ka thaiñ, ban pynbha ïa ka mariang ha sor, bad ban pynduna ïa ka jingkylla ka suiñbneng da kaba pynduna ïa ka jingkhapngiah bad pynduna ïa ka jingjaboh kaba mih na ka jingbun ki kali.
