Shillong, Lber 29
Ka Election Committee jong ka Khasi Students’ Union ka pyntip ba ka ilekshon XVI (Khathynriew) bad kaba dei na ka bynta ka samoi treikam 2026-29 kan long ha ka 9 tarik u Jymmang 2026 naduh ka por 8 baje mynstep haduh 3 baje janmit ha Dinam Hall, Jaïaw, Shillong.
Kane ka Committee ka khot ka wer ïa baroh ki khun samla kiba la ih jong ka Bri u Hynniewtrep, khamtam na ka liang ki dkhot jong ki Unit bapher-bapher ka KSU ba kin mih shakhmat ban ïakit ïabah lem ïa ka lyngkor ba khia jong ka KSU na ka bynta ka ri bad ka jaidbynriew, da kaba ïashimbynta shitrhem ha katei ka ilekshon, ong ka kyrwoh khubor u Chairman ka Election Committee KSU u Bah Danny M. Khyriem.
Ïa ki kot ki sla ban thep kyrteng (nomination paper) yn sdang ban ai naduh ka 04 tarik u ïaiong haduh ka 11 tarik u ïaiong, 2026 naduh ka por 11 baje mynstep haduh 5 baje janmit na ka ophis treikam jong ka seng kaba don ha Jaïaw bad na ka bynta ban pynpoi ïa ki kot ki sla ban thep kyrteng kan long naduh ka 06 tarik u ïaiong haduh ka 13 tarik u ïaïong 2026 haduh ka por 5 baje janmit.
Shuh-shuh la ong ba ka tarik ba khatduh ïa kiba kwah ban weng noh ïa ki kot ki sla thep kyrteng ka dei ha 14 tarik u ïaiong 2026 bad ka jingbishar bniah ïa ki kot ki sla jong kiba thep kyrteng ka long ha ka 15 tarik u ïaiong 2026 ha ka por 1 baje nohphai sngi.
Ïa ki kot ki sla thep kyrteng dei ban pynpoi ha lane shwa jong 13 tarik u ïaïong 2026 haduh ka por 5 baje janmit ha u Chairman lane Secretary ka Election Committee.
Ka Election Committee jong ka KSU ka bthah ïa baroh ki Unit, ki Circle bad ki District Unit ban pynpoi ïa ki kyrteng jong ki nongjied kumba 10 ngut na kawei ka Unit, Circle bad District hapoh ka 11 tarik u ïaïong 2026 ha ophis treikam jong ka seng ha Jaïaw.
