New Delhi, Lber:
Ka tnat Enforcement Directorate ha ka sngi Thohdieng ka la mudui da ka mukotduma pyrshah ïa u president barim jong ka Reliance Communications u Punit Garg bad ïa uwei pat u briew kum shi bynta ban tohkit halor ka jingthok pisa jong ka halor ka jingkynnoh thok ïa ka ram ba T.40,000 klur ha ki bank. U nongpynmih jong katei ka kompeni, u Anil Ambani, um shym la paw ha ka kot jingkynnoh. Ïa kane ka mukotduma la mudui hakhmat ka ïingbishar ba kyrpang ha Rouse Avenue hapoh ka jingtreikam jong ka Prevention of Money Laundering Act (PMLA).
Ka kot mudui kaba don palat ïa ka 170 sla, ka buh kyrteng ïa u Garg bad ïa ka Vaishali Jairam Mane, kaba dei ka Director barim jong ka Bonn Investment Inc, kaba don ha US, kum kiba la shah kynnoh ha katei ka kam, ong ki heh sorkar. Ka ED ka la kem ïa u Garg, uba la 61 snem ka rta, ha u bnai Kyllalyngkot mynta u snem.
U president barim jong ka Reliance Communications (RCOM), haba u bat ïa ki kyrdan ba hakhliehduh kum u nongpynïaid bad nongpynïaid ha ka kompeni naduh u snem 2001 haduh u snem 2025, u la don bynta shitrhem ha ka jingshim, jingbat, jingbuhrieh, jingbuh bad pynsaphriang ïa ki jingmih na ki kam runar ba la pynmih na katei ka kam thok jong ka bank. Ïa ka pisa ba la kynnoh ba la pyndonkam bakla la “pynkylla” lyngba ki bun tylli ki tnad bar ri bad ki tnad ba shabar ri jong ka RCOM, ka la kynnoh.
Kum u president jong ka RCOM, ka tnad ka la ong ba u Garg u la pynïaid ïa ka kam Global Enterprise Business jong ka kompeni hapdeng u snem 2006 bad 2013. U la shakri ruh kum u president (regulatory affairs) naduh u snem 2014 haduh u snem 2017.
Ha u bnai Risaw 2017, u Garg u la shah thung kum u Executive Director na ka tnad RCOM bad u bnai Ïaïong, 2025, u la shakri kum u nongpynïaid bym dei u nongpynïaid jong ka kompeni, ong ka tnat ED.
La lap ba ïa ka jingmih na ki kam runar ba la ïoh na ka jingkynnoh thok la “pynkylla” ban thied ïa kawei ka ïing ba heh bha ha Manhattan, New York.
La kynnoh ba ka Mane ka don jingïadei bad ka jingthied ïa kane ka ïing sah ha Manhattan bad kumta la jer kyrteng ïa ka ha ka kot mudui, la ong ka ED.
Ïa katei ka jaka la die “da kaba thok” ha u snem 2023 ha ka por ba don ka jingpynbeit ïa ka jingbym lah siew pisa jong ka RCOM da u Garg, la ong ka ED. La sngewthuh ba ka RCOM ka la pyntip sha ka jaka die mar shaphang kane ka jingdie “da kaba thok” ha u snem 2025.
“Ka jingmih na ka jingdie kaba $8.3 million (kumba T.69.55 klur ha u snem 2023) la phah na US hapoh ka jingmaham jong ka jingpynbeit bei tyngka thok bad ka kynhun kaba don ha Dubai kaba la synshar da u riew shimet uba don jingïadei bad ka Pakistan, khlem ka jingtip ne jingmynjur jong ka tnad pynbeit jingeh (RP).”
Ka bynta jong ka jingmih na ki kam runar, ka pisa paidbah ba la shim da ka RCOM kum ki ram na ki bank, la “pynkylla” na ka bynta ki jinglut jingsep shimet jong u Garg, kynthup ïa ki jingsiew kiba ïadei bad ka jingpule shabar ri na ka bynta ki khun jong u, la kynnoh ka tnad.
Ha u Nohprah 2025, ka tnat ED ka la mudui ïa ka mukotduma pyrshah ïa ka kynhun jong u Anil Ambani, ka Reliance Power Ltd, bad 10 ngut kiwei pat ha ka mukotduma thok pisa kaba ïadei bad ka jingpynmih ïa ka jingkular bank thok kaba la kynnoh ba T.68 klur na ka bynta ban ïoh ïa ka tender.
Ka tnad tohkit jong ka sorkar pdeng ka la thaw ïa ka kynhun tohkit ba kyrpang ban tohkit ïa ki jingleh be-aiñ ha ka liang ka pisa tyngka ba la kynnoh ba la pynlong da ki kompeni kynhun jong u Anil Ambani katkum ka jingbthah jong ka ïingbishar ba ha khliehduh.
