Shillong, Lber 28
Ka United Democratic Party (UDP) kan sa shong pyrkhat ha kine ki bnai ban wan la kan pynïeng kyrtong ne kan nym pynïeng ha ka ilekshon shiteng samoi jong ka MP Lok Sabha na Shillong parliamentary constituency.
Haba ïakren bad u Bah Titosstarwell Chyne uba dei u General Secretary ka UDP Sengkmie u la ïathuh ba ka UDP kan shong pyrkhat ha kine ki bnai la kan pynïeng ne kan nym pynïeng kyrtong.
U la ïathuh lada ka seng kan pynïeng ruh kan wad da uwei u kyrtong uba thymmai hynrei ïa kane ka shong ha ka jingïapyrkhat lang.
U la pyntip ba ka UDP kan shong ïakren shwa tang na ka seng lajong hadien kata kan sa ïa pynbeit bad ka Regional Democratic Alliance (RDA) kaba donlang bad ka HSPDP.
U Bah Titos u la ïathuh ba lada ka UDP kam pynïeng kyrtong kan sa ïakren lang da baroh ki nongkitkam kiba hakhmat.
Kumban shu pynkynmaw ba ka UDP ka la pynïeng da u Bah Robertjune Kharjahrin kum u kyrtong ha ka ilekshon MP Lok Sabha kaba la dep hynrei u la shah rem noh.
Namar ka jingkhlad noh u Dr. Ricky AJ Syngkon u MP ka Lok Sabha na Shillong Constituency na ka VPP mynta ki seng saiñpyrthei ki hap ban pynkhreh ban sei biang ïa ki kyrtong.
Haduh mynta ki seng saiñpyrthei kiba la pynkhreh ki long ka VPP kaba la sei da u Dr. Batskhem Myrboh uba dei u nongaiktien jong ka VPP, ka NPP kaba bat ïa ka bor synshar ha ka Jylla kan sa pynbna ïa u kyrtong, ka BJP ruh ka la pynkhreh hynrei kam pat tip ïano kan ai tiket, katba ki seng riewlum kum ka UDP bad HSPDP kim pat ïakren haduh mynta.
