Shillong, Lber 29
3 ngut ki rephri ka Jylla ki la lah ban pyndep ïa ka ‘fitness’ bad ka jingthoh ïa ka eksamin na ka bynta ban kyntiew kyrdan sha ka Level 5 hapoh ka All India Football Federation (AIFF).
Kine ki long ka Kong Pipilmoris Wanñiang (referee), lem bad ki assistant referee ka Kong Shidalin L Marshillong bad u bah Jespar Syiemlieh.
Ïa kine ki eksamin la pynlong ha ka 25 bad 27 tarik mynta u bnai ha LNIPE Gwalior. Ïa kiba jop yn sa khot ïa ki sha ka ‘practical’ bad ‘viva’ ha ka por kaba biang.
Ka Level 5 ka dei ka kyrdan kaba nyngkong eh kaba pynlah ïa ki rephri bad ki assistant ba kin pyniaid ïa ki jingïalehkai ha ka kyrdan jong ka ri, kaba kiew sha ka Level 1 na ka bynta kito kiba don ia ka jingpynshisha ba ki don ha ka kyrdan ba kham heh. Ki Level 6-8 ki dei na ka bynta ki rephri ki ban pynïaid ha ki lympung ïalehkai jong ki jylla.
