Nongpoh, Lber 29
Ka Raid Nongpoh kaba hap ha Elaka Nongpoh Sirdarship ha ka sngi Saitjaiñ kala lah ban pyndep noh ïa ka jinglehniam Shad Sajer kaba shisien shi snem ïa kaba la pynlong ha u Lum Wyrtoh marjan bad ka sor Nongpoh, Ri Bhoi District.
Kum ban shu kdew hangne, ka lehniam Shad Sajer jong ka Raid Nongpoh ka dei kaba la pynlong naduh ki por hyndai hynthai da ki mynbarim, hynrei ha ki katto katne ki snem kiba la dep, ïa kane ka jinglehniam la pynsangeh noh bad dei lyngba ka jingshimkhia jong ka Durbar Raid Nongpoh la lah ban bteng biang ïa kane ka jinglehniam ha kine ki khyndiat snem kiba la dep.
Ha kane ka jinglehniam, la wan ban ïadon ryngkat da u MLA ka Nongpoh, u Bah Mayralborn Syiem kum kum u kongsan ha ka jingdon lang u Bah Luistar Lyngdoh, Acting Sirdar ka Hima Nongpoh nalor kiwei kiwei ki nongïalam ka Raid Nongpoh, ki nongïalam na ki seng bapher-bapher bad ki paidbah ka thaiñ.
Lyngba kane ka jinglehniam, la sakhi ruh ïa ki khun samla kynthei bad shynrang kiba la phong da ki riam tynrai kiba ishongkun bad ai ruh ïa ki jingshad tynrai kiba la pynphuh pynphieng ïa kane ka jinglehniam, kiba kynthup kum ka Shad Mastieh, ka Shad Rah Kynthei, ka Shad Shut Wait nalor kiwei kiwei.
Haba ai jingkren ha kane ka sngi, u Bah Mayralborn Syiem u la pynpaw ïa ka jingsngewkmen ban sakhi lang ïa kane ka jinglehniam kaba shongkun bad kongsan jong ka Raid ban pynneh pynsah ïa ka riti ka dustur bad ka jinglong tynrai jong ka thaiñ kaba long ruh kumjuh ban pyni sha ka pyrthei ïa ka jingriewspah ka kolshor jong kane ka thaiñ.
U Bah Mayralborn u la buh ruh ka jingkyntu ïa ki nongïalam bad ki khun jong ka Raid ba kim dei satia ban klet ïa la ka tynrai bad ka jinglong kaba kyrpang ka jong ki wat lada bun ki dei kiba la kylla sha ka niam Khristan bad ong ruh ba ka jingthmu ba kongsan hi jong ka jinglehniam Shad Sajer ka dei ban pynïajan bad pynsngewthuh khambha ïa ki khun ki hajar ïa ka tynrai ka jong ki.
Shuh shuh, u la ong ruh ba ha kane ka juk stad kaba mynta, ka long kaba donkam ban jam shakhmat katkum ka por bad ruh ban nym pynduh pat ïa ka jinglong tynrai kumba la buh da ki mynbarim kulong kumah.
Ha kane ka sngi, la ïoh ruh ka jingkren na u Bah Luistar Lyngdoh, Acting Sirdar ka Hima Nongpoh nalor kiwei kiwei ki nongkren kiba la pynpaw ïa ka jingban jur halor ka jingdonkam ban pynneh pynsah ïa kiba kum kine ki jingleh niam tynrai kiba long ka dak bad ka jinglong tynrai jong ka thaiñ.
