Tehran, Lber:
La iathuh ba ki samla kiba trei mon sngewbha ki tuid sha ki jaka pynrung kam shipai ha kylleng ka Iran katba ka ri ka dang lum lang ia palat shi million ngut ki nongiakhun ha madan thma na ka bynta ka thma madan kaba lah ban jia bad ka America. Ka tnat pathai khubor jong ka Iran, ka Tasnim, da kaba sot ia ka tyllong khubor na ki shipai, ka iathuh ba kitei ki shipai, ki la long kiba la pynbeit ryntih bad ki long kiba la khreh ban ialeh thma. Kane ka long hadien ka jingkiew jong ki nongshong shnong ha ki jaka ba la pyniaid da ki Basij, ki Islamic Revolution Guards Corps (IRGC) bad ki shipai.
Wat hapdeng ka jingkynthoh na u Donald Trump ba ka jingïakren ka dang ïaid shakhmat, hynrei ka Iran ka la kyntait paidbah ïa kino kino ki rukom treikam jong ki shipai na America bad ka la maham ruh ba kan don ka jingpynshitom beiñ kaba jur lada jia ba ki shipai jong ka America kin leit ïuh kjat ha ka khyndew ka shyiap jong ka Iran.
Haba kren ha ka jingialang jong ka kynhun Myntri ha White House ha katei ka sngi, u la pyllait ia kitei ki kyntien, ha kaba u la ong ba ka Iran ka la ailad ia ka US ban shim 10 tylli ki jhad umphniang ban pyni ba ki long kiba “shisha bad kiba skhem.”
Ka Iran ka la khang pyrshah ïa ka jingïaid lynti lyngba ka Strait of Hormuz ïa ki jhad kiba la ngeit ba ki don jingïadei bad ki jingpyrshang shipai jong ka America lane Israel, katba ka ailad ïa kiwei pat ki jhad kiba rit ban ïaid lyngba.
