Shillong, Lber 29
Ki riew kynthei kiba kam ba ki dei kiba wan na ka thymmei jong ka kur Mylliemngap ki la pynpaw ïa ka jingsngewkhia haba ïadei ka jingbymshah ki Rangbah Kur ïa ki kur Mylliemngap kiba dei na ka shnong Nongkynrih, Laitlyngkot, ïewumiong, Rasong, Umthli, Puriang, Rymphlang bad Laitkyrhong, ban ïashim bynta lang ha ka Dorbar bah ka kur kaba la long ha ka 28 tarik Lber (sngi Saitjaiñ) ha Lum Pomblang, Smit.
Kine ki longkmie haba ïakren sha ki nongthoh khubor ki la ong, ban da dei ka Dorbar kur kaba tang na kawei ka kpoh, kim ym leit satia, hynrei namar ba la pynbna paidbah lyngba ki lad pathai khubor ba kan dei ka Dorbar bah jong ka Kur Mylliemngap hapoh ka Bri u Hynñiewtrep, Hynñiewskum kumta ma ki ruh ki la leit ban ïashimbynta ban ïatyllilang kum shikur.
Kine ki longkmie ki la ong ba kiba ïoh ban shong ha kane ka Dorbar bah ki dei tang ki Kur Mylliemngap shikpoh kiba shong ba sah ha ïewpamtiah, ha Smit bad na ka shnong Nongkrem.
Katkum ka jingkam jong kine ki longkmie, ki la kam ba ki la shah khang ha ki Rangbah kur ba na Smit, Nongkrem bad ïewpomtiah bad ki la kyntait ban ithuh ïa ki, kum ki dkhot jong ka kur, da kaba ym shah ïa ki ban don bynta ha katei ka Dorbar bah.
Ka Kong Mebansara Mylliemngap ka la ong ba ki la poi sha katei ka jaka da ka jingmut ban ïashim bynta ha katei ka jingïakynduh lang ka Dorbar bah, hynrei ki la shah khang ha ka khyrdop jong katei ka jaka. “Ngi la shah ong ba kiba dei na kito ki shnong, yn ym shah ban wan ha kane ka jingïalang bah bad haba ngi la kylli ïa ka daw, ki khlem ai ïa ka jubab,” bad bynrap ba tang kiba na Smit, Nongkrem bad Ïewpomtiah la shah ban rung sha katei ka Dorbar bah.
Shuh-shuh ka Kong Wandahun Mylliemngap ka la ong ba kane ka jingleh ka long kaba pynmong ïa ki, da kaba ong ba kum kine ki jingleh kin ktah ïa ka lawei ki khun ba hadien habud. “Lada ngim dei ki Mylliemngap ngi pdiang ïa kata, hynrei kim batai bniah ïa ka daw ba khlem shah ïa ngi,” ka la ong.
Nalor nangta u wei u rangbah uba dei na ka shnong Puriang ruh u la pynpaw ka jingsngewdiaw da kaba ong ba kane ka jingshah kyntait ka pynmong bha ïa ki bad lada kim dei na ka jait Mylliemngap, ki dei ban pyni ïa ka sakhi bad kin ym wan sha ka Dorbar bah lada kim dei na kajuh ka jait.
Kine ki dkhot ba la shah kyntait ha ka Dorbar bah ki la dawa ka jingpynshai na ka kur da kaba kynnoh ba ki don ki katto katne kiba pyrshang ban shim ïa ki rai khlem da don ka jingïamynjur lang bad ka jingïasngewthuh jingmut lang jong baroh.
U Bah Tyngshaiñïabaroh Mylliemngap General Secretary ka kur Mylliemngap u la pynshai haba ïadei ka jingbym shah rung ïa ki longkmie sha ka Dorbar bah jong ka kur, ha kaba u la ong lyngba ka jingpynshai na ka Hima Khyrim, u Myntri Phamsngi Mylliem u ba dei u Myntri ka kur Mylliem na ka raid Nongkynrih, ka Hima Khyrim u la kubur ba u dei na ka jait Mylliem, katba ki bahaïing hasem ki ai da ka jait Mylliemngap da kaba pynkylla na ka jait Mylliem sha ka jait Mylliemngap.
Shuh-shuh u la ong, naduh ba mih ka Hima Khyrim haduh mynta ka kur Mylliemngap ka dei kaba bat ïa ka kyrdan Lyngskhor bad ka kur Mylliem ka dei kaba bat ïa ka kyrdan Myntri bad ong ba kumno u Mylliemngap un wan sha ka kyrdan Myntri.
